Atyraý oblysynda sýalǵan ózender máselesi qalaı sheshiledi

ATYRAÝ. QazAqparat – Atyraýda Ekologııa, geologııa jáne tabıǵı resýrstar mınıstri Serikqalı Brekeshev pen oblys ákimi Mahambet Dosmuhambetovtiń qatysýymen keńes ótti. Onda óńirdiń ekologııalyq problemalary talqylandy, dep habarlaıdy QazAqparat.

Mınıstr Serikqalı Brekeshevtiń aıtýynsha, sońǵy jyldary óńir turǵyndaryn Jaıyq ózenindegi ekologııalyq ahýal alańdatady. Bul kóp talqylanatyn máselege aınaldy.

«Qazir Jaıyq ózeniniń deńgeıi tómendedi. Oıyl, Jem jáne Saǵyz ózenderindegi jaǵdaı da osyǵan uqsas. Bul óńir ekologııasyna keri áser etedi. Jaıyq ózenindegi ahýalǵa baılanysty byltyrǵy naýryzda Reseı Federatsııasynyń Orynbor qalasynda transshekaralyq ózen basseıniniń ekojúıesin 2024 jylǵa deıin saqtaý jáne qalpyna keltirý boıynsha Qazaqstan-Reseı yntymaqtastyǵynyń baǵdarlamasy bekitildi. Al, Oıyl jáne Saǵyz ózenderiniń deńgeıi sýdyń az kelýi saldarynan tómendegeni baıqalyp otyr. Bul ózender arnasyndaǵy sýdyń 80-90%-dan astamy kóktemgi sý tasqyny kezinde tolady. Osyǵan baılanysty «Qazgıdromet» Aqtóbe oblysynyń aýmaǵynan Atyraý oblysyna keletin sý shyǵynyn esepke alý úshin Oıyl jáne Saǵyz ózenderiniń arnalarynda gıdrobeket ornatý múmkindigin qarastyrýy qajet», -dedi Serikqalı Brekeshev.

Mınıstr Atyraý oblysynyń aýmaǵyndaǵy Oıyl ózeniniń tómengi saǵasynda kóktemgi tasqyn sýdy jınaý úshin bóget salý máselesin pysyqtaýdy tapsyrdy.

Oıyl ózenindegi sý aǵyny men deńgeıin arttyrý maqsatynda osy jylǵy mamyr aıynyń sońyna deıin Aqtóbe oblysynyń aýmaǵyndaǵy ıesiz sý sharýashylyǵy qurylystaryn buzý jumysyn aıaqtaýy qajet.

Osy kezge deıin Aqtóbe oblysynda jeti gıdrotehnıkalyq nysan buzylǵan. Endi kóktemgi sý tasqyny bastalǵanǵa deıin taǵy da osyndaı 12 nysan buzylady.

Al, jyl sońyna deıin Saǵyz jáne Jem ózenderiniń basseınderindegi, onyń ishinde ıesiz nysandardy túgendeý aıaqtalady.

Bul jumysty Jaıyq-Kaspıı oblysaralyq basseın ınspektsııasy baqylaýǵa alady.