Atyraý oblysynda sý aıdyndaryna shomylý merzimi 15 maýsymǵa shegerildi
Atyraý oblystyq tótenshe jaǵdaılar departamenti azamattyq qorǵaý basqarmasynyń bastyǵy Baqyt Ablanovtyń aıtýynsha, buryn shomylý merzimi 1 maýsymda bastalatyn edi. Endi bıyl 15 maýsymǵa shegerilip otyr.
«Jaıyq ózeninde sý deńgeıi áli de turaqtaǵan joq. Mundaı kezde aǵys adam ómirine qaýip tóndiredi. Oblys ákiminiń ókimimen tótenshe jaǵdaılardyń aldyn alý, shomylý maýsymynda qaýipsizdikti qamtamasyz etý jónindegi is-sharalar jospary bekitildi. Bıylǵy 17 sáýirde ádilet departamentinde «Atyraý oblysynyń sý obektileri men sý sharýashylyǵy qurylystarynda jappaı demalý, týrızm jáne sport úshin oryndaryn belgileý týraly» qaýly tirkeldi. Qaýlyǵa osyǵan sáıkes oblys aýmaǵynda 46 demalys orny belgilendi. Onyń ishinde 27 orynnyń ınfraqurylymyn qutqarý jabdyqtarymen, qutqarýshylarmen, medıtsınalyq pýnktterimen jaraqtandyrýǵa qarjy bólindi. Jalpy, shomylý maýsymyna arnalǵan demalys ornynyń sany 85%-ǵa artty», - dep habarlady Baqyt Ablanov.
Onyń aıtýynsha, oblys aýmaǵynda shomylýǵa tyıym salynǵan 70 qaýipti ýchaske anyqtalǵan. Bul ýchaskelerde 238 tyıym salý belgisi men 9 aqparattyq stend ornatylǵan. Sý aıdyndarynda qaıǵyly oqıǵanyń aldyn alý maqsatynda kúndelikti úgit-profılaktıkalyq jumysqa 273 adam, 44 avtokólik pen júzý quraly jumyldyrylǵan.
Eske sala ketelik, budan buryn Atyraýda 23 jastaǵy boıjetken kópirden sekirip ketkenin habarlaǵan bolatynbyz.
Keıin 44 jastaǵy mas áıel kópirden sekirmek bolǵanyn jazǵan edik.