Atyraý oblysynda shalǵyn kóbelegine qarsy 4,5 myń gektar alqap óńdeldi

ATYRAÝ. QazAqparat – Atyraý oblysynda shalǵyn kóbelegine qarsy 7,5 myń gektar egin alqabyn óńdeý qajettiligi týyndady. Qazir onyń 4,5 myń gektary óńdeldi, dep habarlaıdy QazAqparat.

Óńirlik kommýnıkatsııalar qyzmetinen túsken aqparatqa sáıkes, Atyraý oblysy ákiminiń orynbasary Qaırat Nurlybaev shalǵyn kóbelegi qaptaǵan egin alqaptaryn óńdeý jumysyn teksergen.

Oblys ákiminiń orynbasary Qaırat Nurlybaevtyń aıtýynsha, 6 maýsymda egin alqaptaryna shalǵyn kóbeleginen zııan kelgeni anyqtalǵan. Egin sharýashylyǵymen aınalysatyn óńirdegi 300-ge jýyq sharýa qojalyǵynyń 100-ge jýyǵy shalǵyn kóbeleginen zardap shekken.

Osyǵan baılanysty týyndaýy múmkin tótenshe jaǵdaıdyń aldyn alý jáne onyń zardabyn joıý maqsatynda shuǵyl shtab otyrysy ótip, tıisti jumystar atqarylǵan.

«Búginge deıin 20 gektar egin alqabyna monıtorıng júrgizildi. Monıtorıng nátıjesinde 7,5 myń gektar alqapty óńdeý qajettiligi týyndady. 4,5 myń gektar egin alqabyna ýlaý jumystary júrgizildi. Onyń ishinde 800 gektar alqapty sharýashylyqtar óz kúshimen óńdedi. Ózge alqapty óńdeý jergilikti bıýdjetten bólingen qarjyǵa jáne demeýshilerdiń qoldaýymen júzege asyryldy», - deıdi Qaırat Nurlybaev.

Onyń aıtýynsha, shalǵyn kóbeleginiń egis alqabyna zııan keltirý jaǵdaıy tirkelgen boıda Batys Qazaqstan oblysynan ýlaý jumystaryn júrgizetin arnaıy mekemeniń mamandary shaqyrylǵan. Qazir Inder, Mahambet, Qyzylqoǵa aýdandaryndaǵy alqaptardy óńdeý áli jalǵasyp jatyr.

«Egin alqaptaryn óńdeý jumystarynyń nátıjesinde shalǵyn kóbeleginen tónetin qaýip seıildi. Sharýa qojalyqtaryna atalǵan jaǵdaıdyń aldyn alý boıynsha keńes berý jáne dárimen qamtamasyz etý atqaryla beredi. Sharýa qojalyqtary egin alqabyna qurt túsý qaýpin jedel habarlasa, odan keletin zııannyń aldyn alýǵa barynsha kómek beremiz», -deıdi Qaırat Nurlybaev.

«Abaı» sharýa qojalyǵynyń jetekshisi Janbolat Bısekenov mundaı tosyn jaǵdaıǵa alǵash ret kezikken. Ol qazir egin alqabyn qorǵaý maqsatynda óz tehnıkasymen ýlaý jumystaryn kúsheıtken.

Shalǵyn kóbelegi egin alqabyna túspeýi úshin erte qamdanǵan sharýalar da bar. Sonyń biri – «Kan G.V» sharýa qojalyǵy.

«Shalǵyn kóbelegine qarsy ýlaý jumystaryn erte bastadyq. Kórshiles Reseıdegi sharýalar osyndaı jaǵdaıǵa tap bolǵanyn estip, biz birden ýlaýǵa kiristik. Mine, sonyń nátıjesinde shalǵyn kóbelegi egin alqabyna kire almady», - deıdi «Kan G.V» sharýa qojalyǵynyń jetekshisi Andreı Kan.

Eske sala ketelik, buǵan deıin Atyraý oblysynda shalǵyn kóbeleginen 100-ge jýyq sharýashylyq zııan shekkenin jazǵan bolatynbyz.