Atyraý oblysynda shalǵaıdaǵy aýyldarǵa avtobýstar júretin boldy

ATYRAÝ. QazAqparat – Atyraý oblysynda shalǵaıdaǵy aýyldarǵa qoǵamdyq kólik qatynaıdy. Qyzylqoǵa jáne Mahambet aýdanyndaǵy eldi mekenderge avtobýs 1 tamyzdan júre bastaıdy, dep habarlaıdy QazAqparat tilshisi.

Atyraý oblystyq jolaýshylar kóligi jáne avtomobıl joldary basqarmasynyń basshysy Samat Aıtqalıevtyń málim etýinshe, bıyl 8 eldi mekenniń turǵyndaryn tasymaldaý úshin mamyr-shilde aılarynda 3 konkýrs ótkizilgen. Konkýrs nátıjesinde «Atyraý-Saǵyz», «Atyraý-Eńbekshil-Ortaqshyl-Esbol-Aqjaıyq», «Atyraý-Saraıshyq-Jalǵansaı» baǵyttaryna turaqty túrde qoǵamdyq kólik qatynaıtyn boldy.

«Konkýrs qorytyndysyna sáıkes jeńimpaz bolyp tanylǵan «Akzhaiyk-Avtopark» JShS-niń qoǵamdyq kólikteri 1 tamyzdan bastap jolaýshy tasymaldaı bastaıdy. Jańa baǵyttarǵa turaqty tasymaldaıtyn marshrýttardy uıymdastyrý, avtokólik joldarynyń jaı-kúıi men qoǵamdyq kólikterdiń qaýipsizdik talaptaryna sáıkestigi belgilengennen keıin júzege asyrylady», - dedi Samat Aıtqalıev.

Onyń aıtýynsha, bıyl jolaýshylardyń turaqty tasymaldanýy men jolaqysynyń qoljetimdiligin saqtaý maqsatynda 62 áleýmettik mańyzy bar marshrýt sýbsıdııalanady. Buǵan jergilikti bıýdjetten 2,1 mlrd teńge bólingen.

«Qyzylqoǵa aýdanyndaǵy Saǵyz aýylyna, Mahambet aýdanyndaǵy Aqjaıyq, Saraıshyq, Jalǵansaı aýyldaryna qoǵamdyq kólik kún saıyn qatynaıdy. «Atyraý-Saǵyz» baǵytyna qatynaıtyn baǵyttaǵy jolaqy 2 myń teńge turady. Al, «Atyraý-Eńbekshil-Ortaqshyl-Esbol-Aqjaıyq» baǵytyndaǵy jolaqy quny - 600 teńge. Sondaı-aq, «Atyraý-Saraıshyq-Jalǵansaı» baǵytymen 400 teńge qatynaýǵa bolady. Bul avtobýstar jol boıyndaǵy birneshe eldi mekendi qamtıdy», - dedi Samat Aıtqalıev.

Eske sala ketelik, buǵan deıin Atyraý oblysynyń eki aýyly «Úzdik 30 aýyl» jobasyna engenin jazǵan bolatynbyz.