Atyraý oblysynda Senat saılaýynda Álibek Náýtıevke kóp daýys berildi
Senat saılaýy Atyraý qalasyndaǵy Qurmanǵazy atyndaǵy mádenıet úıinde ótti. Saılaýǵa Atyraý qalalyq jáne jeti aýdandyq máslıhatynyń 119 depýtaty qatysty. Al, 13 depýtat belgili sebeptermen saılaýǵa qatysqan joq.
Atyraý oblystyq aýmaqtyq saılaý komıssııasynyń málimetine súıensek, súıensek, Senat depýtaty bolý úshin 3 kandıdat tirkelgen. Onyń ishinde 1 áıel, 2 er adam bar.
Ár deńgeıdegi máslıhattardyń depýtattary kandıdattyń biri – Álibek Náýtıevke kóp daýys berdi. Ol máslıhattar depýtattarynyń 81 daýsyn jınaǵan.
Taǵy bir kandıdat Baǵyt Sherkeshbaevaǵa 30, Gılman Sársemálıevke 6 daýys berilgen. Bir bıýlleten búlingen. Bir depýtat barlyq kandıdatqa qarsy daýys bergen.
Álibek Ibatollauly Náýtıev 1963 jyly dúnıege kelgen. 1994 jyly Batys Qazaqstan aýyl sharýashylyǵy ınstıtýtyn zooınjener, 2001 jyly H.Dosmuhamedov atyndaǵy Atyraý memlekettik ýnıversıtetin ekonomıst-qarjyger, 2003 jyly «Qaınar» ýnıversıtetin zańger mamandyǵymen bitirgen.
Eńbek jolyn 1980 jyly Mahambet aýdany Tańdaı orta mektebiniń dene tárbıesi pániniń muǵalimi bolyp bastaǵan. 1986-1987 jyldary «Baqsaı» asyl tuqymdy qoı keńsharynda mal dárigeri bolǵan.
1993-1997 jyldary Mahambet aýdany ákiminiń orynbasary-aýdandyq ekonomıka komıtetiniń tóraǵasy, 1997-2003 jyldary Qyzylqoǵa aýdanynyń, 2003-2008 jyldary Qurmanǵazy aýdanynyń ákimi laýazymyn atqarǵan. 2008 jyly Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy, 2008-2009 jyldary Inder aýdanynyń ákimi bolyp jumys istegen.
2014-2015 jyldary oblystyq jer qatynastary basqarmasynyń basshysy, 2015-2016 jyldary Mahambet aýdanynyń ákimi, 2016-2021 jyldary Atyraý oblysy ákiminiń orynbasary bolǵan. 2021 jyldyń 15 qańtarynda VІІ shaqyrylǵan Atyraý oblystyq maslıhatynyń hatshysy bolyp saılanǵan.
Eske sala ketelik, buǵan deıin Atyraý oblysynda 3 kandıdat Senat saılaýyna túsetinin jazǵan edik.
Keıin Atyraý oblysynda Senat depýtatyn saılaýǵa úsh kandıdat qatysyp jatqanyn, máslıhattardyń 119 depýtaty úsh kandıdatqa daýys bergenin habarlaǵan bolatynbyz.
Basty foto: Azh.kz