Atyraý oblysynda «Saraıshyq» vızıt-ortalyǵy ashyldy

ATYRAÝ. QazAqparat – Atyraý oblysynyń Mahambet aýdanynda «Saraıshyq» vızıt-ortalyǵy ashyldy. Mádenıet jáne sport mınıstri nysannyń jumysymen tanysty, dep habarlaıdy QazAqparat.

«Vızıt-ortalyǵynyń jumysymen tanysý barysynda qonaqtardyń tamaqtanýyna jáne túnep shyǵýyna jaıly jaǵdaı jasalǵan oryndardy, sondaı-aq kelýshiler Qazaq handyǵy, Altyn Orda jáne odan burynǵy dáýirler tarıhymen tanysa alatyn ekspozıtsııalyq zaldy araladym.

Aqparat úsh tilde beriledi. Zal ekrandarmen jáne aqparattyq termınaldarmen jabdyqtalyp, mýltımedııalyq tehnologııalar qoldanylady.

Sondaı-aq, arheologııa zalynda boldym. Munda qalashyqtan tabylǵan jádigerler men uly ǵalym Álkeı Marǵulanǵa arnalǵan shaǵyn ekspozıtsııa usynyldy», - dep jazdy mınıstr.

Málim etilgendeı, vızıt-ortalyqta balalarǵa arnalǵan shyǵarmashylyq sektsııalar da bar.

«Saraıshyq» vızıt-ortalyǵyn iske qosý – bul úlken istiń bastamasy ǵana. Biz nysandy damytýdyń besjyldyq josparyn ázirledik, sonyń arqasynda bul kıeli oryndy sheteldik jáne ishki týrıster úshin tartymdy etemiz dep kútemiz», - deıdi A.Oralov.

Aıta keteıik, Qazaqstanda budan bólek, taǵy úsh vızıt-ortalyq jumys isteıdi: Almaty oblysynda «Tańbaly», Ulytaý oblysynda «Ulytaý» jáne Túrkistan oblysynda «Otyrar».

Bıyl úsh vızıt-ortalyqtyń qurylysyn aıaqtaý josparlanyp otyr. Olar – elimizdiń ońtústigindegi «Saýran», «Gaýhar-ana» jáne «Ordabasy» ortalyqtary.