Atyraý oblysynda Saraıshyq qalashyǵynan mys jáne kúmis tıyndar kómbesi tabyldy

ATYRAÝ. QazAqparat – Atyraý oblysynda Saraıshyq qalashyǵynan mys jáne kúmis teńgeler kómbesi tabyldy, dep habarlaıdy QazAqparat.

Arheolog Amangeldi Zaınovtyń aıtýynsha, H.Dosmuhamedov atyndaǵy Atyraý ýnıversıtetiniń mamandary ortaǵasyrlyq Saraıshyq qalashyǵynda arheologııalyq qazba jumystary júrgizilgen.

Qazba jumystaryna Atyraý oblysynyń ákimdigi qoldaý bildirdi. Oblystyq mádenıet, muraǵattar jáne qujattamalar basqarmasyna qarasty tarıhı-mádenı murany zertteý ortalyǵynyń tapsyrysymen qolǵa alynǵan jumys kezinde kólemi 600 sharshy metr, tereńdegi 2 metr jer aýmaǵy zerttelgen.

«Zertteý jumystarynyń nátıjesinde ortaǵasyrlyq qalanyń turǵyn jaılary, káriz júıesi, keramıkalyq ydystar, monshaqtar, óńdelgen súıekter, dıirmen, urshyq pen qaıraqtyń tastary, temir buıymdar fragmentteri, turǵyn úılerdiń jylý júıesi tabyldy. Qazba ornynan HІV ǵasyrdyń ekinshi jartysyna, Altyn Orda dáýirine sáıkes keletin kúmis, mys tıyndar kómbesi taptyq. Kómbeden 200-ge jýyq kúmis, 50-ge jýyq mys tıyn shyqty. Bul tıyndar Altyn Orda handary Jánibek pen Azız-Sheıh handardyń tusynda soǵylǵany anyqtaldy», -deıdi arheolog Amangeldi Zaınov.

Onyń aıtýyna qaraǵanda, orta ǵasyrdaǵy Saraıshyq qalashyǵyna arheologııalyq qazba jumystary 15 maýsymda bastalǵan. Úı janýarlarynyń súıekteri men balyq qaldyqtary, ózge de artefaktilerdiń naqty aqparaty laboratorııalyq zertteýlerden keıin belgili bolady.

Ótken jyly Saraıshyq aýylynan 15 shaqyrym qashyqtyqta júrgizilgen qazba jumystary kezinde jebe ushtary, aına, keramıka synyqtary, tıyn saqtaıtyn shaǵyn qumyrany, Ózbek han tusyndaǵy teńgeler men monetalardy shyqqan edi. Ǵalymdar Aşysaı ózeniniń jaǵasynda kerýen saraıy, halyq turatyn tutas bir eldi meken bolǵanyn dáleldeıtin jádigerler tapqan bolatyn.

Eske sala ketelik, budan buryn Atyraý oblysynda oǵyz-qypshaq kezindegi balbal tas , keıin kóne qorǵannan sarmat dáýirindegi jádigerler tabylǵanyn jazǵan edik.