Atyraý oblysynda Reseımen shekaradaǵy aýyldar ataýy ózgerdi

ATYRAÝ. QazAqparat – Atyraý oblysynda Reseımen shekaradaǵy okrýg pen aýyldyń ataýy ózgerdi. Endi aýyldyq okrýgke de, aýylǵa da Bókeı han aty berildi, dep habarlaıdy QazAqparat.

Bókeı han ataýy Atyraý oblysynyń Qurmanǵazy aýdanynda Baıda aýyldyq okrýgi men Kotıaev aýylyna berilip otyr.

Endi oblystyq máslıhattyń sheshimimen Baıda aýyldyq okýrgi Bókeıhan aýyldyq okrýgine, Baıda aýyldyq okrýginiń Kotıaevka aýyly Bókeıhan aýyly bolyp ózgerdi.

Reseımen shekaralas Qurmanǵazy aýdanyndaǵy aýyldyq okrýgtiń ákimi Júsip Tóreǵalıevtyń aıtýynsha, bul másele turǵyndar jıynynda qozǵalǵan.

«Eki eldiń shekarasyndaǵy aýylymyz Kotıaev atalatyn edi. Aýyl ataýyn ózgertý máselesi turǵyndar arasynda kópten beri kóterilip keledi. Biraq, bul – búginge deıin sheshimin tappaǵan máseleniń biri. Aýyl men okrýgtiń ataýyn ózgertý máselesi qozǵalǵan jıynda ardagerler, qoǵamdyq keńes músheleri men turǵyndardan eki usynys tústi», -deıdi Júsip Tóreǵalıev.

Onyń birinshici – Kotıaev ataýyn Bókeı han dep ózgertip, okrýgtiń ataýyn burynǵysha qaldyrý. Al, ekinshi usynysta okrýgke de, aýylǵa da qazaqtyń birtýar tulǵasy Bókeı hannyń atyn berý aıtylǵan.

Atyraý oblystyq máslıhatynyń depýtattary aýyl turǵyndarynyń birinshi usynysyna qoldaý bildirdi. Sóıtip, okrýgke de, aýylǵa da Bókeı han ataýyn berýge sheshim qabyldady.

Sondaı-aq atalǵan aýdandaǵy Teńiz aýyldyq okrýginiń Prımore aýyly Teńiz aýyly bolyp qaıta atalatyn boldy. Al, Atyraý qalasyna taıaý ornalasqan Aqsaı selolyq okrýgi taratylyp, Qaıyrshaqty selolyq okrýgine qosylatyn boldy.

Eske sala ketelik, budan buryn Atyraý oblysynda ulttyq qolónerdi qaıta jańǵyrtqan otbasy turatynyn jazǵan edik.