Atyraý oblysynda poshtashy gazet-jýrnaldy elektrli mopedpen jetkizip júr
Janar Muhanbetova Isataı aýdandyq poshta torabynda kýreri bolyp jumys isteıdi. Kýrerdiń mindeti – gazet-jýrnaldardy, hattardy jetkizý. Ol merzimdi basylymdardy elektrli mopedpen tasyp júr.
«Buryn gazet-jýrnaldy jaıaý jetkizip, sharshaıtyn edim. Gazet-jýrnaldar salynǵan sómkeni alyp júrý jeńil emes. Elektrli mopedti 200 myń teńgege satyp aldym. Qazir jumysym edeýir jeńildedi», -deıdi Janar Muhanbetova.
Onyń aıtýynsha, jańa úlgidegi kóligin 2-3 saǵat elektrmen qýattandyrady. Kóliktiń qýaty 45 shaqyrym jol júrýge jetedi.
Isataı aýdanynyń ákimi Polymbet Hasanovtyń aıtýynsha, jumyssyz jandar kýrer sekildi qarapaıym jumysty atqarýǵa qyzyǵýshylyq tanytar emes. Qazir aýdanda eki kýrerdiń orny bos tur.
«Kún saıyn jumysqa kele jatyp, aýdandyq poshta torabynyń aldynda turǵan eki dóńgelekti mopedti kóremin. Bul tehnıkany kim, qandaı maqsatta paıdalanatynyn bilgim keldi. Kóliktiń ıesi – kýrer qyzmetin atqaryp júrgen Janar Muhanbetova. Qarapaıym eńbek adamymen tanysyp, jumysyna sáttilik tiledi», -deıdi Polymbet Hasanov.
Aýdan ákiminiń pikirinshe, ár adam jumysyn shyn nıetimen atqarar bolsa, zeınetin kóredi.
«Ákimdik tarapynan qarapaıym eńbek adamdaryna qoldaý kórsetiledi. Máselen, byltyr poshta salasynda uzaq jyl gazet tasýshy bolǵan Qalampyr Súıeýqyzy «Eren eńbegi úshin» medalimen marapattaldy. Sondyqtan, jastardy qyzmettiń bedeline qaramaı, adal eńbek etýge shaqyramyn» -deıdi Polymbet Hasanov.
Eske sala ketelik, buǵan deıin Atyraý oblysynda aýyl kásipkeri buqtyrylǵan túıe etin qalbyrǵa salyp shyǵaratynyn jazǵan edik.