Atyraý oblysynda polıtseıler kópbalaly ananyń úıine jóndeý júrgizip berdi
Qurmanǵazy aýdanynyń polıtsııa bóliminiń ýchaskelik polıtsııa ınspektory, polıtsııa aǵa leıtenanty Birjan Mahmýdov áriptesterine Jumeken aýylynda turatyn kópbalaly ana Ekaterına Koprovanyń otbasyna kómek kórsetý týraly usynys bergen.
«Qazir Ekaterına egde jastaǵy syrqat anasymen birge turady. Áleýmettik jaǵdaıy tómen otbasylar sanatyna kiredi. Balalarynyń úlkeni 3-synypta oqıdy. Kenjesi – 1 jasta. Aýdandyq polıtsııa bóliminiń qyzmetkerleri meniń usynysyma qoldaý bilirdirip, qarajat jınady. Sol qarajatqa kópbalaly otbasynyń úıine jóndeý júrgizip, esigi men terezelerin jańasyna aýystyrdyq. Buryn onyń úıinde eden bolmaǵan. Sondyqtan, aǵashtan eden tóseldi. Tabıǵı gaz jelisin kirgizip, tamaq pisirýge arnalǵan gaz plıta satyp alyp berdik», -deıdi Birjan Mahmýdov.
Aýdan polıtseıleri 34 jastaǵy áıeldiń balalaryna jańa kıim men oqý quraldaryn syıǵa tartty.
«Qaıyrymdylyq – qanymyzda bar qasıet. Bizdiń árkez muqtaj jandardy qoldaýǵa daıyn turamyz. Byltyr aýdan poıtseıleri Kúıgen eldi mekeninde turatyn jaǵdaıy tómen otbasynyń úıine kógildir otyn jelisin kirgizip, jylý syılaǵan edik. Biz muqtaj jandarǵa qaıyrymdylyq kómek kórsetýdi jalǵastyra beremiz», -deıdi aýdandyq polıtsııa bólimi bastyǵynyń mindetin atqarýshy Naızabek Qubashev.
Eske sala ketelik, buǵan deıin Atyraý oblysynda volonterler jeti balaly otbasyǵa úı syılaǵanyn jazǵan edik.