Atyraý oblysynda paıdalanylmaǵan jer telimderi tárkilendi

ASTANA. QazAqparat - Mahambet aýdanyndaǵy kóshpeli otyrysta jerdi berý jáne paıdalaný monıtorıngi máseleleri talqylandy, dep habarlaıdy Atyraý oblystyq Óńirlik kommýnıkatsııalar qyzmeti.

Atyraý oblystyq jerdiń paıdalanylýy men qorǵalýyn baqylaý basqarmasynyń basshysy Gúlzııa Qurmanovanyń málimdeýinshe, 2017 jyly ınspektorlar 534 jospardan tys tekserý jumystaryn júrgizgen. Nátıjesinde jerdiń paıdalanylýy salasynda 448  quqyq buzýshylyq anyqtalǵan. Quqyq buzýshylarǵa 61 mln.teńge kóleminde aıyppul salyndy.

Berilmegen 105 jer ýchaskesi (66 myń gektardan asa) tárkilendi.

«Qazirgi tańda paıdalanylmaǵan jer telimderin  tárkileý jumystary júrgizilýde. Eń basty másele, jeke tulǵalar aýyl sharýashylyq jumystaryna jer satyp alady, keıinnen olardy  jeke turǵyn úı qurylysy úshin qaıta satady. Osyndaı jaǵdaı Bereke aýylynda oryn aldy. Adamdar úı saldy, al biz ol jerleriń zańsyz ekenin  aıtýymyz kerek, - dedi Mahambet aýdanynyń ákimi Syrym Rysqalıev. - Kezinde bireýler qurylys jumystaryna ruqsat bergen, biraq tekserý jumystarynyń nátıjesi boıynsha zańsyz dep tanylyp otyr».

Atyraý oblysynyń ákimi Nurlan Noǵaev óz kezeginde osy aýyl turǵyndarymen jıi kezdesetinin atap ótti.

«Aýyl sharýashylyǵyna arnalǵan  bul jer telimderi aýyl sharýashylyq jumystaryna bólingen. Biz barlyq jerdi alý mindetin qoımaımyz, biraq bul ýchaskelerde úı salýǵa bolmaıdy. Osyndaı faktilerdi ashyp, qajet bolǵan jaǵdaıda, zań boıynsha mundaı qurylymdardy buzý týraly aýdan ákimine mindet júktedim. Burynǵy qalpyna keri qaıtarýdy tapsyrdym. Tek osy jaǵdaıda ǵana zańsyz qurylys júrgizetin adamdar oılanyp, jerdi zańsyz alý joldaryn toqtatady. Biz aýyl sharýashylyǵymen aınalysqysy keletin adamdarǵa jer telimderin taýyp berýge tyrysamyz, desek te júzdegen gektar jer ne maqsatyna saı paıdalanylmaıdy, ne keri satylýda, - deıdi Nurlan Noǵaev. - Sonymen qatar, aýdan ákimderi osyndaı jaǵdaıdaǵy jer  ıelerimen kezdesip, olardyń máselesin sheshý týraly usynys jasaý kerek. Halyqtyń kinási - myna jerlerdi satyp alǵany».

Jylyoı aýdanynda ruqsatsyz jer telimderinde zańsyz salynǵan úsh kásipkerlik nysan anyqtaldy.  Ákimdik ǵımarattardy buzý týraly sheshim qabyldady.

2017 jyldan bastap jerdiń paıdalanylýy men qorǵalýyn baqylaý basqarmasy jer telimderin anyqtaý úshin aeroǵaryshtyq sýretterdi paıdalanýdy bastady. Ótken jyly 9 myńǵa jýyq zańsyz jer telimderi anyqtaldy. Bul jumys aǵymdaǵy jyly jalǵasady. Arnaıy toptar quryldy, olar aerofototúsirilim derekterin paıdalana otyryp, jer ýchaskelerin tekseredi jáne jer telimderin durys paıdalanýdy retteıdi.

Jıyn sońynda oblys ákimi jaýapty tulǵalarǵa birqatar tapsyrmalar berdi.