Atyraý oblysynda paıdalanylmaǵan 21 myń gektardan astam jer keri qaıtaryldy
Oblys ákiminiń baspasóz qyzmetinen málim etkendeı, jyl basynan beri kólemi 21552,25 gektardy quraıtyn aýyl sharýashylyǵy maqsatyndaǵy 23 jer ýchaskesi memleketke keri qaıtyrylǵan.
Atyraýda ıgerilmegen jaıylym jerin memleketke qaıtarý maqsatynda jıyn ótti.
Oǵan Aýyl sharýashylyǵy mınıstrligi jer resýrstaryn basqarý komıtetiniń tóraǵasy Murat Temirjanov, jergilikti atqarýshy organ ókilderi men atyraýlyq sharýalar qatysty.
«Bizdiń jumys saparymyzdyń basty maqsaty – aýyl sharýashylyǵy salasyndaǵy túıindi máselelerdi sheshý joldaryn qarastyrý. Memleket basshysynyń tapsyrmasyna sáıkes, bizdiń josparymyzdaǵy basty basymdyq – aýyl sharýashylyǵy maqsatynda paıdalanylmaı jatqan jer telimderin keri qaıtarý. Osyǵan oraı óńirlerdegi jaǵdaıdy saralap, paıdalanylmaı jatqan jerlerdi qaıtarý jumystaryn saralaýdy kózdedik», -deıdi atalǵan komıtettiń basqarma basshysy Aıdos Abdrahmanov.
Oblystyq jerdiń paıdalanýy men qorǵalýyn baqylaý basqarmasynyń basshysy Gúlzııa Qurmanovanyń málimetinshe, jyl basynan beri 21552,25 gektar aýyl sharýashylyǵy maqsatyndaǵy 23 jer ýchaskesi memleketke qaıtyrylǵan.
«Aýyl sharýashylyǵy maqsatyndaǵy jer telimin maqsatty paıdalanýǵa qatysty qalalyq, aýdandyq jer qatynastary bólimderi túgendeý jumystaryn júrgizdi. Sonyń nátıjesinde aýyl sharýashylyǵy maqsatynda ıgerilmegen 75 jer ýchaskesi týraly aqparat jer resýrstaryn basqarý komıtetine joldandy», -deıdi Gúlzııa Qurmanova .
Eske sala ketelik, budan buryn Atyraý oblysyna sáýirden beri 480 tonna qant jetkizilgenin habarlaǵan bolatynbyz.