Atyraý oblysynda otyz jylda AITV ınfektsııasyn juqtyrǵan 13 adam kóz jumǵan

ATYRAÝ. QazAqparat – Atyraý oblysynda 30 jylda AITV ınfektsııasyn juqtyrǵan 13 adam kóz jumǵan. Al, bıylǵy 4 aıda atalǵan dertti 17 adam juqtyrǵan, dep habarlaıdy QazAqparat tilshisi.

Atyraý oblystyq juqtyrylǵan ımmýn tapshylyǵy sındromy (JITS) ortalyǵynda adamnyń ımmýn tapshylyǵy vırýsy (AITV) ınfektsııasyn juqtyrǵan 328 adam dıspanserlik esepte tur.

«Atyraý oblysynda AITV ınfektsııasyn juqtyrý deregi 1993 jyly anyqtalǵan. Sodan bergi kezeńde 13 adam atalǵan dertten qaıtys boldy. AITV ınfektsııasy emdelmegen jaǵdaıda JITS satysyna ulasady. Bul dertti juqtyrǵandar aıyqpaıdy. Aýyrǵan patsıentterdiń ımmýnıteti ınfektsııaǵa qarsy kúsheıtilgen dári-dármekti qabyldaǵannan keıin qalypty bolyp turady. Byltyrǵy 4 aıda 25 adamnan qaýipti ınfektsııa belgisi anyqtalǵan edi. Al, bıylǵy 4 aıda bul aýrýdy juqtyrǵan 17 adam tirkeldi. Onyń ishinde 5 áıel (29,4), 12 (70,6%) er bar», -dep habarlady ortalyqtyń baspasóz qyzmeti.

Ortalyq dárigerleriniń aıtýynsha, bul ınfektsııanyń taralýynyń úsh joly anyqtalyp otyr.

Bul jynystyq, ınektsııalyq jáne anasynan balaǵa juǵý jolymen taraıdy.

Bıyl AITV ınfektsııasyn 13 adam (76,5%) geteroseksýaldy jynystyq qatynas kezinde juqtyrǵan.

Eske sala ketelik, buǵan deıin Atyraý oblysynda byltyrǵy 10 aıda AITV ınfektsııasyn juqtyrý 1,8 ese óskenin habarlaǵan edik.

Qaýipti ınfektsııany juqtyrǵan 61 naýqastyń arasynda 5 sheteldik, 56 qazaqstandyq bolǵan.

Dertti juqtyrýshylardyń deni – er adam.

AITV ınfektsııasymen tirkelgender sanynyń artýyna turǵyndardy testileý kórsetkishiniń 10 paıyzǵa óskeni sebep bolǵan.