Atyraý oblysynda oqýshy sany 600-den asatyn mektepterde sabaq onlaın ótedi

ATYRAÝ. QazAqparat – Atyraý oblysynda 600-den astam oqýshysy bar mektepterde sabaq onlaın ótedi, dep habarlaıdy QazAqparat.

Budan buryn «qyzyl» aımaqtaǵy Atyraý oblysynda 437 adam koronavırýs ınfektsııasyn juqtyrǵanyn jazǵan bolatynbyz.

Koronavırýs ınfektsııasyn juqtyrýshylar sanynyń kúrt ósýine baılanysty 1 780 oryndyq rezervtik tósek-oryn daıyndalǵan edi.

Osyǵan baılanysty búgin Atyraý oblysynda karantın sharalary kúsheıtildi.

Oblystyń bas memlekettik sanıtar dárigeriniń mindetin atqarýshy A.Bekeshevanyń qaýlysyna sáıkes, endi 600-ge deıin oqýshysy bar mektepter sabaqty shtattyq rejımde ótkizedi.

Al, 600-den asatyn oqýshy oqıtyn mektepter qashyqtyqtan oqytý formatyna kóshedi.

Sondaı-aq, 0,1 jáne 2-synyptarda oqýshylar shtattyq formatta oqıdy. Mektepterde 3, 4, 5-synyptardyń oqýshylary úshin kezekshi synyptar ashylady.

Kezekshi synyptarda oqýshy sany 15 baladan artyq bolmaýy kerek.

«Kolledjder men joǵary oqý oryndarynyń stýdentterin oqytý aralas oqytý formatyna: barlyq dárister onlaın, tájirıbelik, zerthanalyq, semınarlyq sabaqtar ıkemdi keste boıynsha shtattyq rejımde, vaktsınatsııalanǵan oqýshylar men tolyq vaktsınatsııa kýrsyn aıaqtaǵan stýdentterdi oqý orny ákimshiliginiń qaraýy boıynsha shtattyq rejımde oqytýǵa jol beriledi. Epıdemıologııalyq táýekel aımaǵyna qaramastan mektepten tys qosymsha bilim berý uıymdarynda jeke sabaqtar shtattyq rejımde, toptyq – 10 adamǵa deıin, múmkindigi shekteýli balalar/eresekter úshin túzetý (korrektsııa) ortalyqtarynda/bólmelerinde jeke jáne 8 adamǵa deıingi toptyq sabaqtar shtattyq rejımde ótkiziledi», -delingen jańa qaýlyda.

Jańa qaýly qol qoıylǵan kúnnen bastap zańdy kúshine enedi.