Atyraý oblysynda oǵyz-qypshaq dáýirindegi balbal tas tabyldy
Balbal tas Qyzylqoǵa aýdanyndaǵy Saǵyz aýylynyń mańyndaǵy «Tasqara» qorǵanynan tabylǵan. Arheologtar balbal tasty shamamen ІH-HІ ǵasyrǵa tıesili degen boljam jasap otyr.
Arheologııalyq olja sanalatyn balbal tastyń bıiktigi – 1 metr 20 sm, al, eni – 50 sm. Buryn Atyraý oblysynda dál mundaı balbal tas tabylmaǵan.
«Balbal tasty oǵyz-qypshaq dáýirinen qalǵan dep boljaýǵa bolady. Kóne túrki ǵurpynan syr shertetin kóne jádigermen birge tabynýǵa arnalǵan quraldar tabyldy. Mundaı balbaltastar IX ǵasyrdan bastap ıslam dini taraýyna baılanysty dalamyzdan joıyla bastady. Óıtkeni ıslam dininde adam beınesin salýǵa ruqsat etilmeıdi», - deıdi tarıh magıstri Seıilhan Mırash.
Qyzylqoǵa aýdanynda kóne qorǵandar kóp. Buryn bul aýdannyń aýmaǵynda bizdiń zamanymyzǵa deıingi ІІ ǵasyr men bizdiń zamanymyzdyń HІ ǵasyry aralyǵyn qamtıtyn Mııaly qorǵany bar. Bul qorǵandy 2017 jyly oblystyq tarıhı-ólketaný mýzeıi anyqtaǵan edi. Qorǵannyń joǵarǵy qabaty H-HІ ǵasyrlardan, tómengi qabaty bizdiń zamanymyzǵa deıingi ІІ ǵasyrdaǵy temir dáýirinen syr shertedi.
Al, 2020 jyly osyndaǵy úsh qorǵanda júrgizilgen qazba jumystary kezinde 560 túrli jádiger tabyldy. Onyń ishinde altyn men kúmisten soǵylǵan áshekeı buıymdar men at ábzelderi, qoladan soǵylǵan qarý-jaraqtyń, keramıkalyq qumyralar men qaıshy da bar. Qabirdiń birine jerlengen adam qańqasynyń jambasynda qadalyp turǵan jebe synyǵy bolǵan.
«Bul jerlegen adamnyń soǵysta qaza tapqanynyń belgisi bolýy múmkin. Ony ǵun nemese oǵyz taıpasynyń ókili dep topshylap otyrmyz. Sebebi, qorǵannan tabylǵan mola sol kúıi saqtalǵan», - dep edi sol kezde mýzeı dırektory Rashıda Harıpova.
Eske sala ketelik, budan buryn Atyraýdaǵy Mııaly qorǵanynan 560 jádiger tabylǵanyn jazǵan edik.