Atyraý oblysynda munaı aıdaý stansasynyń mańynda 20 gektar jer órtendi
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, órt Inder aýdanynda tutanǵan.
«Eltaı aýylynyń mańynda munaı aıdaý stansasy bar. Atalǵan mańyndaǵy dala shóbi janyp, 20 gektar aýmaqqa jaıyldy. Jalyndy sóndirýge tótenshe jaǵdaılar departamentiniń 9 qyzmetkeri men erikti órt sóndirý jasaǵynan 14 adam, 3 órt sóndirý mashınasy, 1 sý tasıtyn kólik, 1 traktor tartyldy», - dep habarlady departamenttiń qoǵammen baılanys toby.
Eske sala ketelik, budan buryn Atyraý oblysynda jyl basynan 1,2 myń ga orman alqaby órtengenin habarlaǵan bolatynbyz.
Oblystyq tótenshe jaǵdaılar departamentiniń qoǵammen baılanys tobynan málim etkendeı, byltyr 7 orman órti tirkelgen.
«Bıyl Atyraý oblysynyń orman qoryndaǵy 1246 gektardy sharpyǵan 3 órt oqıǵasy tirkeldi. Bul byltyrǵy kórsetkishpen salystyrǵanda 42 ese tómen. Al turǵyndar tarapynan abattandyrý, qýraǵan shópterdi órteý kezinde otty qaraýsyz qaldyrý saldarynan shabyndyq jerlerde, ashyq alańdarda, avtojol boıy men kanal jaǵalaýynda 91 gektar aýmaq janyp ketti», - dep málim etti qoǵammen baılanys tobynan.
Qutqarýshylar oblys turǵyndary men qonaqtary órt qaýipsizdigi erejesin qatań saqtaýdy surap otyr.
Birinshiden, shabyndyq, egistik, orman alqaptarynda qýraǵan shópterdi, qoqystardy órtep, baqylaýsyz qaldyrýǵa jol berilmeýi kerek.
Ekinshiden, aýa raıy qurǵaq, ystyq jáne qatty jel kezinde ot jaqpaǵan jón.
Úshinshiden, tabıǵat aıasyndaǵy demalys aıaqtalǵan kezde janǵan otty sý quıyp, qum nemese topyraq seýip, tolyq óshkenine kóz jetkizgen durys. Eń bastysy, órtti óz kúshimen sóndirý múmkin bolmasa, 101, 112 nómirleri arqyly habarlaý qajet.