Atyraý oblysynda medıtsına qyzmetkerlerine zańsyz ústemeaqy tólengen

NUR-SULTAN. QazAqparat – Esep komıteti Atyraý oblysyndaǵy respýblıkalyq bıýdjettiń atqarylýy týraly qorytyndyny jarııalady, dep habarlaıdy QazAqparat tilshisi.

Aýdıt nátıjesinde rásimdik sıpattaǵy 223 buzýshylyq, 5 júıeli kemshilik anyqtalǵan. 22,7 mlrd teńgeni tıimsiz josparlaý, 7,8 mlrd teńgeni tıimsiz paıdalaný, 0,2 mlrd teńge yqtımal shyǵyndar tirkelgen.

Vedomstvonyń habarlaýynsha, «Áleýmettik medıtsınalyq saqtandyrý qory» AQ COVID-19 indetimen kúres aıasynda epıdemııaǵa qarsy jumyldyrylǵan medıtsına qyzmetkerlerine 105,9 mln teńge negizsiz qosymsha aqy tólegen.

Sondaı-aq, jyl saıyn Atyraý oblysynyń 2016-2020 jyldarǵa arnalǵan aýmaqtardy damytý baǵdarlamasynyń oryndalmaǵan nysanaly ındıkatorlarynyń úlesi (14,8%-dan 28,3%-ǵa deıin) artyp keledi. Bul rette memlekettik baǵdarlamalardyń nysanaly ındıkatorlarynyń 58,4%-y baǵdarlamada kórsetilmegen. Oblystaǵy jergilikti atqarýshy organnyń memorandýmy 2018-2020 jyldary negizgi nysanaly ındıkatorlardyń orta eseppen 24%-y oryndalmaýyna jol bergen.

Aýdıt qorytyndysy boıynsha Esep komıteti Úkimetke zańnamany jetildirý jónindegi tıisti usynymdar berdi. Atyraý oblysynyń ákimine anyqtalǵan buzýshylyqtar men kemshilikterdi joıý boıynsha shara qabyldaýǵa jáne qoldanystaǵy zańnamany buzýǵa jol bergen laýazymdy tulǵalardyń jaýapkershiligin qaraýǵa tapsyrma berildi.

Ákimshilik isterdi qaraýǵa ýákiletti organdarǵa 40 buzýshylyq faktileri boıynsha materıal jiberilgen.