Atyraý oblysynda Májilis depýtattyǵyna 13 kandıdat talasady
Atyraý oblystyq aýmaqtyq saılaý komıssııasynyń málimetine súıensek, 19 naýryzda ótetin Májilis jáne máslıhattar saılaýyna 496 kandıdat usynylǵan. Onyń ishinde 462 kandıdat (93,14%) tirkelgen.
«Parlament Májilisiniń depýtatyn saılaý boıynsha №13 birmandatty aýmaqtyq saılaý okrýgine 20 kandıdat usynylǵan edi. Onyń ishinde 16 kandıdat (nemese 80%) ózin-ózi usyndy. Al 4 kandıdat (nemese 20%) – saıası partııalardyń ókili. Kandıdattardy tirkeýge deıin 1 kandıdattyń zań talaptaryna sáıkes kelmegeni anyqtaldy. Onyń ótelmegen nemese alynbaǵan sottylyǵy bar. Sondaı-aq saılaý komıssııasyna kózdelgen barlyq qujatty usynbaýyna baılanysty 6 kandıdatty tirkeýden bas tartyldy», - dep habarlady oblystyq aýmaqtyq saılaý komıssııasynan.
Osylaısha, Atyraý oblysynan Parlament Májilisiniń depýtattyǵyna usynylǵan kandıdattardyń 13-i nemese 65% tirkeldi. Qazir tómengi palata depýtattyǵy úshin bir mandatqa 13 adamnan keledi.
Tirkelgen kandıdattardyń 10-y (77%) ózin-ózi usynǵan. Sondaı-aq (23%) úsh partııa usynǵan 3 kandıdat tirkelip otyr. Kandıdattardyń arasynda jeteýi (53,84%) er adam, altaýy (46,16%) áıel.
Eske sala ketelik, Atyraýda Parlament Májilisiniń depýtattyǵyna 20 kandıdat usynylǵanyn habarlaǵan bolatynbyz.