Atyraý oblysynda maýsymdyq jumysqa kelgen 660 sheteldikke ruqsat berildi

ATYRAÝ. QazAqparat – Atyraý oblysynda maýsymdyq jumystarǵa keletin sheteldikterge 800 kvota bólindi. Osy kezge 660 sheteldikke ruqsat berildi, dep habarlaıdy QazAqparat tilshisi.

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń deregine súıensek, byltyr maýsymdyq jumystarǵa tartylatyn sheteldikterge 381 kvota bólingen.

«Bizdiń negizgi maqsatymyz – jyl saıyn sheteldik jumys kúshin azaıtyp, jergilikti adamdardy jumyspen qamtý. Byltyr jergilikti sharýagerler aýyl sharýashylyǵy úshin eńek mıgranttaryn jumysqa tartýǵa ruqsta aldy. Bıyl sheteldik jumys kúshiniń maýsymdyq qyzmeti úshin bólinetin 800-ge kóbeıtildi. Jergilikti sharýagerlerdiń usynysy eskerilip, osyndaı sheshim qabyldandy. Óıtkeni, sharýa ıeleriniń aıtýynsha, aýyl sharýashylyǵy, egin jumystaryna jergilikti azamattar ynta tanytpaıdy eken. Maýsymdyq jumystar bastalǵaly eńbek mıgranttaryna kvota sheńberinde 660 ruqsat berildi», -dep habarlady Azamat Mámbetov.

Onyń aıtýynsha, aýyl sharýashylyǵy salasyndaǵy maýsymdyq jumys 15 aqpanda bastalyp, 15 qazanǵa deıin jalǵasady. Al, jylyjaıdaǵy jumys jyl boıy júrgiziledi.

Eske sala ketelik, budan buryn Atyraý oblysynda ýaqytsha turýǵa ruqsat berilgen sheteldikter qatary kóbeıgenin habarlaǵan edik.

Oblystyq polıtsııa departamentiniń baspasóz qyzmetinen málim etkendeı, bıylǵy jyl basynan beri 17 337 sheteldikke ýaqytsha turýǵa ruqsat berilgen.

Onyń ishinde 2 514 adam alys shetelderden kelgeni anyqtalǵan. Sondaı-aq, TMD elderinen kelgen 14 823 adam tirkelgen.