Atyraý oblysynda mal urlap júrgen qylmystyq top ustaldy
Oblystyq polıtsııa departamenti krımınaldyq polıtsııa basqarmasynyń qyzmetkerleri 1-10 naýryz aralyǵynda «Mal urysy» jedel profılaktıkalyq is-sharasyn ótkizdi.
«Іs-shara aıasynda qurylǵan 10 arnaıy top músheleri mal jáne et ónimderin tasymaldaıtyn 331 avtokólikti, mal jáne et ónimderin satatyn 204 oryn men 489 sharýa qojalyǵyn tekserdi. Shalǵaıdaǵy ýchaskelerdi, qystaqtardy jáne ujymdyq sharýa qojalyqtaryn tekserý kezinde zańsyz saqtalǵan bir atys qarýy tárkilendi. Al, qarý ıelerine azamattyq, qyzmettik qarýdy, onyń patrondaryn satyp alý, saqtaý, paıdalaný jáne tasymaldaý bóligin buzǵany úshin 18 ákimshilik quqyq buzýshylyq týraly hattamalar jasaqtalyp, 275 670 teńgeniń aıyppuly salyndy», -deıdi departament bastyǵy Nurhat Orazbaev.
Sondaı-aq, mal jáne et ónimderin qujattarsyz tasymaldap, qujatsyz satqan 33 adam anyqtalǵan.
Olarǵa QR Ákimshilik quqyq buzý týraly kodeksiniń 406-babyna sáıkes 796 380 teńgeniń aıyppuly salynyp otyr.
Aýyl sharýashylyǵy janýarlaryn ıeleriniń nemese olar ýákilettik bergen adamdardyń qadaǵalaýynsyz jaıýyna baılanysty 167 adam atalǵan qujattyń 408-babymen 284 859 teńgeniń aıyppulyn arqalady.
«Júrgizilgen jedel-izdestirý is-sharalarynyń nátıjesinde mal urlyǵymen aınalysqan 2 adamnan quralǵan 1 qylmystyq top pen 6 adam anyqtaldy. Kúdiktilerdiń qatysýymen jasalǵan 6 mal urlyǵy dáleldendi. Onyń 2-eýi ótken jyldary, 4-eýi buryn jasalǵan mal urlyǵy sanatyna jatady. Urlanǵan 20 mal zańdy ıelerine qaıtaryldy. Onyń ishinde 5 jylqy, 5 iri qara jáne 10 usaq mal bar. Іshki ister mınıstrliginiń Biriktirilgen derekter bankisiniń «Eseptegi element» esebine 16 adam «mal urysy», 13 adam «mal soıýshy», 1 adam «urlanǵan maldy satýshy» sanatymen alyndy«, -dep málim etti Nurhat Orazbaev.