Atyraý oblysynda mádenıet úıiniń esepshisi 13 mln teńge jymqyrǵan
Atyraý oblystyq ishki memlekettik aýdıt departamenti basshysynyń orynbasary Rústem Túsipbergenniń aıtýynsha, birneshe mekemede júrgizilgen jospardan tys tekserýdiń nátıjesinde óreskel qarjylyq zań buzýshylyq anyqtalǵan.
«Jylyoı aýdanynda №2 jalpy orta bilim beretin mekteptiń dırektory jumys istemegen eki adamǵa úsh jyldan beri jalpy somasy 5 mln teńgeden astam qarjyny jalaqyǵa aýdaryp kelgen. Osylaısha, bilim ordasynyń basshysy eńbek jáne bıýdjet kodeksteriniń talaptaryna qaıshy áreketke barǵan. Aýdıt qorytyndysymen maqsatsyz jumsalǵan qarjy tolyqtaı qaıtaryldy», - deıdi Rústem Túsipbergen.
Onyń aıtýynsha, qarjyny maqsatsyz jumsaý Qurmanǵazy aýdanyndaǵy Shortanbaı aýyldyq mádenıet úıinde de anyqtalyp otyr.
«Mádenıet oshaǵynyń esepshisi óziniń banktegi karta shotyna 13 mln teńgeden astam qarjyny zańsyz aýdarǵan. Osy kezge deıin 5 mln 650 myń teńge keri qaıtaryldy. Esepshige qatysty sot protsesi áli jalǵasyp jatyr», - dep málim etti Rústem Túsipbergen.
Eske sala ketelik, budan buryn Atyraýda jubaıy men qyzyna 1,1 mln teńgeni zańsyz aýdarǵan mádenıet úıiniń meńgerýshisi sottalǵanyn habarlaǵan bolatynbyz. Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń birinshi orynbasary Nurlan Jahınnyń aıtýynsha, mádenıet úıiniń meńgerýshisi 3,5 jylǵa sottaldy.
«Jylyoı aýdanynyń Qosshaǵyl aýylyndaǵy mádenıet úıiniń meńgerýshisi jubaıy men qyzyn resmı jumysqa ornalastyrǵan. Sóıtip, eńbekaqy tóleýge bólingen 1,1 mln teńgeden astam mólsherde zalal keltirdi. Jylyoı aýdandyq sotynyń úkimimen mádenıet úıiniń meńgerýshisi 3 jyl 6 aıǵa bas bostandyǵynan aıyryldy. Sottalýshynyń kámeletke tolmaǵan balalarynyń bolýyna baılanysty jazasyn óteý 5 jylǵa keıinge qaldyryldy», - dep habarlady Nurlan Jahın.