Atyraý oblysynda qyrylǵan balyqtan 1,1 mln teńge shyǵyn keldi
Eske sala ketsek, Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylyp jatqany jóninde budan buryn habarlaǵan bolatynbyz. Jergilikti turǵandar tıisti organǵa tótenshe jaǵdaı týraly habar bergen.
Budan keıin Atyraýda ózendegi balyqtardyń qyrylý sebebin anyqtaýǵa tabıǵatty qorǵaý prokýratýrasy kirisken edi. Atalmysh jaǵdaıǵa baılanysty búgin QR AShM orman sharýashylyǵy jáne janýarlar dúnıesi komıteti habarlama taratty.
«Osy oraıda oblystyq orman sharýashylyǵy jáne janýarlar dúnıesi aýmaqtyq ınspektsııasy mamandary balyqtardyń qyrylǵan jerine tekserý júrgizdi. Tekserý nátıjesinde atalǵan sý aıdynynda jalpy salmaǵy 1 154 keli qara balyq túrleriniń (móńke - 827 keli, qylyshbalyq - 160 keli, aınamkóz - 2 keli, taban - 165 keli) qyrylyp qalǵany anyqtaldy. Baqylaý kezinde ólgen balyqtardyń mehanıkalyq jolmen jaraqattanǵany belgili boldy», - delingen habarlamada.
Komıtettiń habarlaýynsha, osy jaǵdaı jóninde barlyq múddeli memlekettik organdar men uıymdarǵa habarlanǵan. Laboratorııalyq zertteý júrgizý úshin ólgen balyqtardyń synamalary alynǵan.
«Balyqtardyń qyrylý sebebi anyqtalǵanǵa deıin jınalǵan óli balyqtar «Nadejda - 1» JShS-yna saqtaýǵa tapsyryldy. Balyq resýrstaryna keltirilgen zııan mólsheri 1 110 148 teńgeni quraıdy. Atalmysh fakt sotqa deıingi tergep-tekserýdiń biryńǵaı tizilimine tirkeldi. Materıaldar Atyraý oblystyq polıtsııa departamentine joldandy», - delingen komıtettiń habarlamasynda.
Osy jaǵdaıdan keıin balyqtardyń qyrylý faktileri tirkelmegen. Atyraý oblysyndaǵy balyqtar meken etetin sý aıdyndarynda turaqty túrde monıtorıng júrgizilip jatyr. Laboratorııalyq zertteý jumystarynyń qorytyndysy boıynsha balyqtyń qyrylý sebepteri týraly aqparat qosymsha habarlanady.