Atyraý oblysynda qumar oıyndy zańsyz uıymdastyrǵandar sottaldy
Atyraý oblysy boıynsha ekonomıkalyq tergep-tekserý departamenti uıymdastyrý-baqylaý basqarmasynyń basshysy Bekbolat Ánesovtiń málimetinshe, zańsyz oıyn bıznesi Qurmanǵazy aýdanynda uıymdastyrylǵan.
«Qarjy monıtorıngi organdarynyń negizgi mindetteriniń biri – «kóleńkeli ekonomıka» salasyn, onyń ishinde zańsyz oıyn bıznesin uıymdastyrýshylarmen kúresý. Agenttiktiń Atyraý oblysy boıynsha departamentiniń qyzmetkerleri bıylǵy jyldyń maýsym jáne tamyz aıy aralyǵynda Qurmanǵazy aýdanynyń Qurmanǵazy aýylynda ornalasqan «Mırǵalı» avtoturaǵynyń aýmaǵyndaǵy dúńgirshekte tyıym salynǵan qumar oıyndy uıymdastyrǵan eki adamdy anyqtady. Olar aldyn ala sóz baılasyp, elimizde bekitilgen oıyn bıznesi zańnamasyn buzatyn qylmystyq áreket jasaǵan», -dep habarlady Bekbolat Ánesov.
Qurmanǵazy aýdandyq sot úkimen qumar oıyndy zańsyz uıymdastyrǵandar QR Qylmystyq kodeksiniń 307-babynyń 2-bóliginiń 2,3-tarmaqtary boıynsha kináli dep tanyldy.
Olardyń árqaısysy 2 (eki) jylǵa bas bostandyǵynan shekteý jazasyna sottaldy.
Sot úkimi zańdy kúshine endi.
Eske sala ketelik, buǵan deıin Atyraý oblysynda jyl basynan beri 57 ekonomıkalyq qylmys tergelgenin habarlaǵan bolatynbyz.
Atyraý oblysynda jyl basynan bergi 9 aıda ekonomıkalyq tergep-tekserý departamenti qyzmetkerleriniń tergeýine 57 qylmystyq is túsken.
Onyń ishinde 32 qylmystyq isti tergeý aıaqtaldy. Bul - barlyq istiń 56,1 paıyzy.
Óńirdegi sottardyń qaraýyna 23 qylmystyq is (40,3%) joldandy.
Qylmystyq ister boıynsha kelgen zalal mólsheri – 2,9 mlrd teńge. Bul qarjynyń 2,3 mlrd teńgesi bıýdjetke qaıtarylǵan.
Ashyq kózderden alynǵan foto