Atyraý oblysynda kóshi-qon zańyn buzǵan 100 sheteldik elden shyǵaryldy
Atyraý oblystyq polıtsııa departamenti baspasóz qyzmetiniń málimetinshe, jyl basynan beri kóshi-qon zańdylyǵyn buzǵan sheteldikterge 17 mln teńgeniń aıyppuly salynǵan.
«Jyl basynan beri 33 myńnan astam sheteldik ýaqytsha turýǵa ruqsat aldy. Kóshi-qon zańdylyqtaryn buzǵany úshin 4976 tulǵa ákimshilik jaýapkershilikke tartyldy. Elimizdiń aýmaǵynan 100 sheteldik shyǵaryldy. Qazaqstan Respýblıkasynyń kóshi-qon zańdylyǵyn buzǵan azamattarǵa 17 mln teńgeden astam aıyppul salynyp, tolyqtaı óndirildi. QR Qylmystyq kodeksiniń 392, 395 jáne 394-babbymen (QR shekarasyn qasaqana zańsyz kesip ótý, zańsyz kóshi-qondy uıymdastyrý) 9 derek tirkeldi. Qazir tergep-tekserý amaldary júrgizilip jatyr», -dep habarlady departamenttiń baspasóz qyzmeti.
Jyl basynan beri oblysqa kelgen sheteldikter tarapynan 15 qylmys jasalǵan. Al, sheteldikterge qarsy jasalǵan 35 qylmys tirkelgen.
«Qazaqstan Respýblıkasynda turaqty turatyn sheteldikter esebinde 5 136 adam bar. Bularǵa qosa, 215 sheteldik esepke qoıyldy. Qazaqstan azamattyǵy jeńildetilgen tártippen 224 adamǵa berildi», -dep málim etti departamenttiń baspasóz qyzmetinen.
Eske sala ketelik, buǵan deıinAtyraýda el aýmaǵyna zańsyz kelgen sheteldik 6 aıǵa sottalǵanyn habarlaǵan edik.
Bıylǵy 21 sáýirde Ózbekstan Respýblıkasynyń 44 jastaǵy azamaty jeke basyn kýálandyratyn qujatsyz Qazaqstan Respýblıkasynyń memlekettik shekarasynan qasaqana zańsyz ótken.
Onyń buryn el aýmaǵynan 5 jylǵa tysqary shyǵarylǵany anyqtalǵan.
Qurmanǵazy aýdandyq sotynyń úkimimen Ózbekstan Respýblıkasynyń azamaty kináli dep tanylyp, 6 aı merzimge bas bostandyǵynan aıyryldy.
Sheteldikke el aýmaǵyna 5 jyl merzimge kelýge tyıym salyndy.