Atyraý oblysynda kóshi-qon zańnamasyn buzǵan 14 sheteldik el aýmaǵynan shyǵaryldy
Oblystyq polıtsııa departamentiniń baspasóz qyzmetinen málim etkendeı, Qazir «Jaldanýshy – 2022» jedel aldyn alý is-sharasy ótip jatyr. Іs-sharanyń maqsaty – zańsyz kóshi-qon arnalaryn anyqtaý, shetel azamattary jasaǵan qylmystardy anyqtaý.
«Atyraý qalalyq polıtsııa basqarmasy men Inder aýdandyq polıtsııa bóliminiń qyzmetkerleri Ózbekstan Respýblıkasynan kelgen 37 adamnyń ruqsat qujatysyz ári zańsyz jumys istep júrgenin anyqtady. Qazir shetel azamattaryna qatysty QR Ákimshilik quqyqbuzýshylyq týraly kodeksiniń 517-babynyń 5-bóligimen ákimshilik hattama toltyrylyp, sheshim qabyldaý úshin Atyraý qalasynyń mamandandyrylǵan ákimshilik sotyna jiberildi», -dep habarlady departamenttiń baspasóz qyzmeti.
Sot sheshimimen Ózbekstan Respýblıkasynyń 14 azamaty kóshi-qon zańnamasyn buzǵany úshin el aýmaǵynan shyǵaryldy. Sondaı-aq, óz erkimen el aýmaǵynan shyǵý týraly sot sheshimin oryndamaı júrgen ózbekstandyq 9 azamat anyqtaldy. Olar 19 qyrkúıekte «Tájen» baqylaý beketi arqyly el aýmaǵynan májbúrlep shyǵarylǵan.
«Sheteldiktiń is-áreketteri memlekettik qaýipsizdikti nemese qoǵamdyq tártipti qorǵaýdy qamtamasyz etý múddelerine qaıshy kelse, halyqtyń densaýlyǵy men ımandylyǵyn saqtaý, Qazaqstan Respýblıkasy azamattarynyń jáne basqa da adamdardyń quqyqtary men zańdy múddelerin qorǵaý úshin qajet bolsa, Qazaqstan Respýblıkasynyń zańnamasyn buzsa, shyǵaryp jiberý týraly sheshimdi sot qabyldaıdy. Sheteldik osy sheshimde kórsetilgen merzimde Qazaqstan Respýblıkasynan ketýge mindetti», -dep málim departamenttiń baspasóz qyzmetinen.
Eske sala ketelik, buǵan deıin Atyraý oblysynda kóshi-qon zańnamasyn buzǵan 22 sheteldik ustalǵanyn habarlaǵan bolatynbyz.