Atyraý oblysynda qorshaǵan ortany qorǵaý jóninde arnaıy komıssııa qurylady
Atyraý oblysynyń ákimi Serik Shápkenovtiń tapsyrmasyna sáıkes ákimdik janynan qorshaǵan ortany qorǵaý jóninde komıssııa qurylatyn boldy.
«Komıssııanyń negizgi quzyretine birneshe máseleni engizý qarastyrylyp otyr. Onyń ishinde tabıǵatty qorǵaý is-sharalarynyń oryndalysyn qadaǵalaý, qorshaǵan ortany qorǵaý jóninde usynymdar daıyndap, jergilikti atqarýshy jáne ortalyq memlekettik organdarǵa joldaý kiredi», -dep habarlady oblys ákiminiń orynbasary Jasulan Bısembıev.
Onyń aıtýynsha, komıssııa quramyna salaǵa jaýapty memlekettik organdardyń ókilderin, ǵalymdar men depýtattardy, belsendilerdi engizý kózdelgen. Komıssııanyń alǵashqy otyrysy 30 naýryzda ótedi. Otyrysta qaralatyn máseleler áli naqtylanyp jatyr.
Eske sala ketelik, budan buryn Atyraý turǵyndary aýadaǵy sasyq ıiske shaǵymdanǵanyn habarlaǵan bolatynbyz.
Turǵyndar Іnstagram áleýmettik jelisinde sasyq ıisten júrek aınyp, bas aınalǵany jóninde jazǵan edi.
Atyraý qalasynyń úsh turǵyny oblystyq ekologııa departamentine shaǵym bergen. Onyń biri Laýra Súleımenova ózge óńirge kóshý máselesin oılastyryp júrgeni týraly vıdeo júktegen bolatyn.
Al, Atyraý munaı óńdeý zaýytynyń qoǵammen baılanys bólimi kásiporynnyń shtattyq rejımde jumys istep turǵanyn málim etti.
«Jel soltústik-batystan, ıaǵnı Atyraý qalasynan zaýytqa qaraı soǵyp tur. Demek, Atyraý munaı óńdeý zaýytynyń óndiristik protsesi – jaǵymsyz ıistiń kózi emes», -dep habarlady zaýyttyń qoǵammen baılanys bólimi.