Atyraý oblysynda koronavırýs juqtyrýshylar kóbeıip barady

ATYRAÝ. QazAqparat – Atyraý oblysynda keıingi úsh aıda revaktsınalaýdan ótkender sany 25% ósti. Alaıda, koronavırýs ınfektsııasyn juqtyrý deregi kóbeıip barady, dep habarlaıdy QazAqparat tilshisi.

Atyraý oblystyq densaýlyq saqtaý basqarmasynyń basshysy Ashan Baıdýálıevtiń málimetinshe, 21-30 maýsym aralyǵynda Atyraý qalasynda 22, Teńiz ken ornynda 5, Qurmanǵazy men Maqat aýdanynyń árqaısysynda bir naýqas tirkelgen.

«Naýqastardyń 23-inde sımptomdy, al 6-aýynda sımptomsyz belgi bar. Dárigerlerdiń ambýlatorlyq baqylaýyna 15 adam alyndy. Al, 14 adam №2 oblystyq aýrýhanaǵa em qabyldaý úshin jatqyzyldy. 3 shildede 8 adamnan koronavırýs ınfektsııasy anyqtaldy. Keıingi eki aptada aýrýshańdyq kórsetkishi 8 esege ósip otyr», - dedi Ashan Baıdýálıev.

Onyń aıtýynsha, óńirde vaktsına alýy tıis kontıngent – 365 760 adam. Osy kezge deıin vaktsınanyń I komponentin 271 429 (74,2%), II komponentin 259 009 (70,8%) adam alǵan.

«Oblysta koronavırýs ınfektsııasyna qarsy salynatyn vaktsınanyń tapshylyǵy joq. Qazir 130 myń vaktsına bar. Onyń ishinde Dúnıejúzilik densaýlyq saqtaý uıymy maquldaǵan «Pfizer» jáne Qazaqstanda shyǵarylǵan «QazVac» vaktsınasynyń qory jetkilikti. Shilde aıyndaǵy jaǵdaı boıynsha revaktsınalaýdan ótetin adamdardyń sany – 250 601. Osy kezge deıin revaktsınalaýdan 90 314 (36,04%) adam ótti. Bul sońǵy 3 aıda revaktsınalaý kórsetkishi 25%-ǵa óskenin baıqatady», - dedi Ashan Baıdýálıev.

Densaýlyq saqtaý mınıstrliginiń málimetine qaraǵanda, ótken táýlikte Atyraý oblysynda 10 adam koronavırýs ınfektsııasyn juqtyrǵan.

Aıta ketsek, buǵan deıin Atyraý oblysynda qus tumaýynyń tirkelýine baılanysty úı qustaryn egýge 6,2 myń doza vaktsına bólindi.