Atyraý oblysynda koronavırýs juqtyrǵandardyń 60% qalada tirkelgen

ATYRAÝ. QazAqparat – Atyraý oblysynda koronavırýs ınfektsııasyn juqtyrǵandardyń 60 paıyzy óńir ortalyǵynda tirkelgen, dep habarlaıdy QazAqparat.

Oblystyq Sanıtarııalyq-epıdemıologııalyq baqylaý departamenti basshysynyń orynbasary Gúlnaz Erbatyrovanyń málimetinshe, shildede koronavırýs ınfektsııasyn juqtyrýdyń 9 445 jaǵdaıy tirkelgen. Al, tamyzdaǵy 10 kúnde 4 379 naýqas anyqtalǵan.

«Koronavırýs ınfektsııasyn juqtyrǵan naýqastardyń 60 paıyzy Atyraý qalasynda tirkelip otyr.

Buǵan qosa, Jylyoı aýdany men Teńiz ken ornynda epıdemııalyq ahýal nasharlady. Qaýipti vırýsqa shaldyqqandardyń 59 paıyzy klınıkalyq sımptom negizinde anyqtaldy. Al, 15-20 paıyzy – naýqastarmen qarym-qatynasta bolǵandar. Bul óńirde epıdemııalyq ahýaldyń nasharlaǵanyn baıqatady», - deıdi Gúlnaz Erbatyrova.

Eske sala ketelik, buǵan deıin Atyraý oblysynda epıdemıologııalyq ahýal kúrdelene túskenin, kópshilik is-sharalardy ótkizý toqtatylǵanyn jazǵan bolatynbyz.