Atyraý oblysynda kóne qorǵannan sarmat dáýirindegi jádigerler tabyldy

ATYRAÝ. QazAqparat – Atyraý oblysynda kóne qorǵannan sarmat dáýirindegi jádigerler tabyldy, dep habarlaıdy QazAqparat tilshisi.

Atyraý oblystyq tarıhı-ólketaný mýzeıiniń janynan qurylǵan ekspedıtsııa Qyzylqoǵa aýdanyndaǵy Mııaly aýylynan 6 shaqyrym qashyqtyqta ornalasqan №3, 4 jáne 5-qorǵanda arheologııalyq qazba jumystaryn júrgizip jatyr.

Qazba jumystaryna ál-Farabı atyndaǵy QazUÝ-diń doktoranty Erden Oralbaı jetekshilik etedi. Ekspedıtsııa quramynda Astana halyqaralyq ýnversıtetiniń PHD doktory Eldos Qarıev, Atyraý oblystyq tarıhı-ólketaný mýzeıi arheologııa ǵylymı-zertteý bóliminiń meńgerýshisi Aıdos Qalshabaev pen tarıh ǵylymdarynyń kandıdaty Marat Qasenov bar.

Aıdos Qalshabaevtyń aıtýynsha, qazba júrgizilgen qorǵandar bizdiń zamanymyzǵa deıingi VI-IV ǵasyrlardaǵy savromat-sarmat dáýirine jatady.

«Qazba kezinde №3 qorǵannyń ortalyq jerleý orny tonalǵany anyqtaldy. Odan ártúrli tústegi monshaqtar tizbesi, qaıraq tas, al adam jerlenbegen bos qabirden (kenotaf) temir qanjar (aqınaq) tabyldy. Jasóspirim jerlengen qabirge 2 qysh ydys qoıylǵan. Al, №4 qorǵandy zertteý kezinde eki adamnyń shashylǵan súıegi men birqatar qola jebelerdi taptyq», - deıdi Aıdos Qalshabaev.

Onyń aıtýynsha, qosalqy qabirdiń birine jas qyz ekbetinen jatqyzylyp, eki qoly búgilgen kúıde jerlengen. Taǵy bir qabirden jaýynger súıegi shyqqan. Onyń jambas súıeginiń joǵarǵy jaǵynda temir qanjar (aqınaq) qoıylǵan. Sol aıaǵynyń astyńǵy jaq syrtynda 20-dan asa aǵash saby saqtalǵan qola jebe, tas qaıraq, órnektelgen súıek, qaban tisinen jasalǵan boıtumary bar áshekeıler tabylǵan.

«Qorǵandaǵy bir qabirge áıel jerlengen eken. Onyń janynan betine sary tústi metall jalatylǵan tutqasy bar qola aına, qola biz tabyldy. Súıektiń eki qolynyń bilek tusynda temir bilezik, moınynda shar tárizdi pishinderden quralǵan altyn alqa bolǵan. Aıaq jaǵyna usaq maldyń jilikteri men qabyrǵalary, temir pyshaq qoıylypty», - deıdi Aıdos Qalshabaev.

Al, №5 qorǵannyń ortalyq bóliginen tutqasy bar qola aına, qysh ydys synyqtary men adam súıekteri tabylǵan.

Eske sala ketelik, buǵan deıin Atyraý oblysynda oǵyz-qypshaq dáýirindegi balbal tas tabylǵanyn jazǵan bolatynbyz.