Atyraý oblysynda qaıtys bolǵan 30 adamnyń atyna bıýdjet qarjysy zańsyz aýdarylǵan
Atyraý oblystyq prokýratýrasynyń baspasóz qyzmetinen málim etkendeı, múmkindigi shekteýli jandardyń quqyǵyn buzýǵa qatysty 100-den astam derek anyqtalǵan.
«Prokýrorlyq qadaǵalaý sharalarymen múgedek adamdardyń jeke kómekshileriniń qyzmetine tıisti baqylaý júrgizilmegeni, 69 kómekshiniń basqa mekemelerde jumys istegeni, qaıtys bolǵan 30 adamnyń atyna bıýdjet qarajaty zańsyz aýdarylǵany anyqtaldy.
Budan bólek, Atyraý qalalyq máslıhatynyń sheshimine ózgerister engizilip, múgedek balalardy úıde oqytqany úshin tólem 2,4 aılyq eseptik kórsetkishten 5 aılyq eseptik kórsetkishke deıin kóterildi. Múgedektigi bar úsh adamnyń jumys ýaqytynyń uzaqtyǵy qysqartyldy. Olarǵa qosymsha demalys kúnderi qamtamasyz etildi», - dep habarlady prokýratýranyń baspasóz qyzmetinen.
Múgedekterdiń kedergisiz kirip-shyǵýyna qatysty talaptarǵa sáıkes kelmeıtin áleýmettik nysandar da anyqtalyp otyr. Osyǵan baılanysty buzýshylyqtar joıylyp, kináli laýazymdy tulǵalar tártiptik jaýapqa tartyldy.
Eske sala ketelik, buǵan deıin Atyraýda ata-ana qamqorlyǵynsyz qalǵan 11 bala úı kezegine qoıylmaǵanyn jazǵan bolatynbyz.
Atyraý qalalyq prokýratýrasynyń aqparatyna súıensek, jergilikti ýákiletti organdardyń áreketsizdiginen jetim jáne ata-ana qamqorlyǵyna alynbaǵan 11 bala baspana kezegine alynbaǵany anyqtaldy. Olar balalar úıinen shyǵarylǵan kezde zańǵa sáıkes turǵyn úısiz qalýy múmkin. Prokýrorlyq den qoıý sharalarynan soń 11 adam tıisti esepke alyndy.