Atyraý oblysynda Kaspıı jaǵalaýyndaǵy 3 gektarda qamys byqsyp jatyr
Oblystyq tótenshe jaǵdaılar departamenti qoǵammen baılanys tobynyń málimetinshe, búgin, 14 sáýirde jergilikti ýaqytpen saǵat 8:45-te qamystyń byqsyp jatqany anyqtalǵan.
«Atyraý qalasynda tútinniń ıisi sezildi. Osyǵan baılanysty tótenshe jaǵdaılar departamentiniń jedel toby Atyraý qalasyna jaqyn ornalasqan Damby aýylynan 30 shaqyrym qashyqtyqtaǵy Kaspıı teńiziniń jaǵalaýyna barlaý júrgizdi. Jedel top teńiz jaǵalaýyna jetken kezde qamystyń órtenbegenin anyqtady. Alaıda, «Aqjaıyq» memlekettik tabıǵı rezervatynda shamamen 3 gektar aýmaqta qamystyń tamyry byqsyp jatyr», - dep habarlady departamenttiń qoǵammen baılanys toby.
Teńiz jaǵalaýyndaǵy qamys órtin sóndirýge tótenshe jaǵdaılar departamentinen 18 qyzmetker men 3 tehnıka, «Aqjaıyq» memlekettik tabıǵı rezervatynan 15 adam, 3 tehnıka, 2 motopompa jumyldyryldy.
Eske sala ketelik, buǵan deıin Kaspıı jaǵalaýynda janǵan qamys tútini Atyraýdy basyp qalǵanyn habarlaǵan edik.
Tútinge baılanysty atyraýlyq turǵyn kóshege bet tumshalaıtyn maska kıip shyqty.
Sondaı-aq, Atyraý oblysynyń ákimdigi «Aqjaıyq» rezervatyn óz balansyna berýdi surap otyrǵanyn jazǵan bolatynbyz.
Kaspıı jaǵalaýynda janǵan qamys órti 5 kúnnen soń sóndirildi. Atyraý oblystyq tótenshe jaǵdaılar departamenti qoǵammen baılanys tobynyń málimetinshe, qamys órti 6 sáýirde saǵat 21:30-da tolyq sóndirilgen. «Qazaqstan ǵarysh sapary» kosmomonıtorınginiń qorytyndysyna sáıkes, «Aqjaıyq» memlekettik tabıǵı rezervaty aýmaǵyndaǵy órttiń jalpy aýdany 1 200 gektar boldy.
«Kaspıı jaǵalaýyndaǵy batpaqty, sýly jerde 2 sáýirde qamys órti tutandy. Bul – Atyraý qalasynan 30 shaqyrym qashyqtaǵy aýmaq. Jalynnan flora men faýna zardap shekken joq. Óıtkeni, qustardyń uıa salý kezeńi áli bastalmaǵan», - dep habarlady departamenttiń qoǵammen baılanys toby.