Atyraý oblysynda Kaspıı ıtbalyqtarynyń sanaǵy júrgiziledi
21:44, 09 Aqpan 2019
ATYRAÝ. QazAqparat - Atyraý oblysynda Kaspıı ıtbalyqtarynyń sanaǵy júrgiziledi. Olardyń sany sońǵy ret 6 jyl buryn anyqtalǵan bolatyn, dep habarlaıdy QazAqparat tilshisi.
«Itbalyqtardyń popýlıatsııasyn esepteý úshin, áýeden túsirilim jasaıtyn kesheni bar ushaq-zerthana jumyldyrylady. Bul keshenge teplovızor, fotoapparattar, bortta ornatylǵan aspaptyq jáne vızýaldyq aqparattyń avtomattandyrylǵan júıesi kiredi. Zertteýge negiz retinde qazirgi kezde reseılik zertteýshilerdiń Baltyq teńizindegi ıtbalyqtardy zertteý kezinde qoldanatyn ádistemesi alynǵan», - dep habarlady «Nort Kaspıan opereıtıng kompanı» baspasóz qyzmetinen.
Jumystarǵa ıtbalyqtardy zertteýmen aınalysatyn reseılik jáne qazaqstandyq ǵalymdar, sondaı-aq Mıkrobıologııa jáne vırýsologııa ınstıtýtynyń, Qazaqstandyq qoldanbaly ekologııa agenttiginiń qyzmetkerleri qatysady.
Avtory: A.Sokolov