Atyraý oblysynda qarjy pıramıdalarynan 500 adam zardap shekken
Atyraý oblysy boıynsha ekonomıkalyq tergeý departamenti uıymdastyrý-baqylaý basqarmasynyń basshysy Bekbolat Ánesovtiń málimetine súıensek, bıylǵy 6 aıda 25 quqyq buzýshylyq deregi tirkelgen.
«Departament qyzmetkerleriniń tergeýine 43 qylmystyq is tústi. Onyń ishinde 26 qylmystyq isti tergeý aıaqtaldy. Bul - qylmystyq isterdiń 60,5 paıyzy. Sotqa 20 qylmystyq is joldandy. Al, 6 is óndiristen alyndy. Qylmystyq ister boıynsha keltirilgen zalal mólsheri – 1,3 mlrd teńge. Bıýdjetke 495,3 mln teńge keri qaıtaryldy. Jalpy somasy 206,6 mln teńge bolatyn múlikke toqtam salyndy. Qylmystyq jolmen tabylǵan zańsyz qarjydan 701,9 mln teńge qaıtarylyp otyr», - deıdi Bekbolat Ánesov.
Onyń aıtýynsha, Atyraý oblysynda qarjy pıramıdalarynan 500 adam zardap shekken. Osyǵan baılanysty tıisti is-sharalar júrgizilip, qarjy pıramıdasy túrinde jumys istegen 120 áleýmettik medıa saıt pen akkaýnt jabylǵan.
«Jedel izdestirý sharalary kezinde is júzinde qajetti jumystar oryndalmaı, qyzmetter kórsetilmeı, taýarlar tıelip-jóneltilmeı, tek shot-faktýra boıynsha áreketter jasaý deregimen 2 quqyq buzýshylyq tirkeldi. Atyraý qalasyndaǵy jaldamaly páter men monshada poker qumar oıynyn uıymdastyrǵandardyń qylmystyq áreketi áshkerelendi. Sot úkimimen zańsyz oıyn bıznesine qatysy bar adamdar kináli dep tanyldy», - dep málim etti Bekbolat Ánesov.
Eske sala ketelik, budan buryn Atyraýdaǵy monshada qumar oıynyn uıymdastyrǵandar ustalǵany habarlanǵan edi.