Atyraý oblysynda káriz qudyǵyn jóndep jatqan 2 jumysshy kóz jumdy

ATYRAÝ. QazAqparat – Atyraý oblysynda káriz qudyǵyna qulaǵan 2 jumysshy kóz jumdy, dep habarlaıdy QazAqparat tilshisi.

Oqıǵa búgin, 13 shildede Jylyoı aýdanyndaǵy Jańa Qaraton kentinde bolǵan. Bul derekti «Jylyoı Sý» mekemesi rastady.

«Búgin Jylyoı aýdanynda jóndeý jumystaryn júrgizý kezinde «Jylyoı Sý» mekemesiniń 2 jumysshysy káriz qudyǵynda qaza tapty. Atyraý oblysynyń memlekettik eńbek ınspektsııasy basqarmasy osy jaǵdaıdy tekserý boıynsha arnaıy komıssııa qurdy», - dep habarlady kommýnaldyq mekemeden.

Jylyoı aýdandyq tótenshe jaǵdaılar bóliminiń basshysy Narıman Óteshovtiń aıtýynsha, jumysshylardyń qudyqqa qulaǵany týraly habar 9:42-de túsken. Habardy Jańa Qaraton kentiniń turǵyndary bergen.

Káriz qudyǵynyń tereńdigi - shamamen 7-8 metr. Eki jumysshy jóndeý júrgizý kezinde qudyqqa qulap ketken. Jóndeý jumysyna negizinen 5 adamnan turatyn brıgada tartylǵan.

«Jylyoı Sý» mekemesi qaza tapqan jumysshylardyń otbasyna materıaldyq kómek kórsetedi.

Eske sala ketelik, budan buryn Atyraý oblysynda terezeden qulaǵan úsh balanyń bireýi mert bolǵanyn habarlaǵan edik. Oblystyq tótenshe jaǵdaılar departamentiniń qoǵammen baılanys tobynan málim etkendeı, jyl basynan beri balalardyń terezeden qulaýyna baılanysty 3 derek tirkelgen.

«Bıyl Atyraý oblysynda 3 bala terezen qulap ketti. Onyń ishinde 2 jaǵdaı - Atyraý qalasynda, bireýi - Inder aýdanynda tirkelip otyr. Eki bala aýrýhanaǵa túsip, emdelip shyqty. Ókinishke qaraı, qulaǵan balanyń bireýi mert boldy. Balalardyń terezeden qulaýyna birneshe sebep bar. Birinshiden, ásirese, jaz mezgilinde turǵyndar kópqabatty úılerdiń terezesine arnaýly bekitkish qondyrymaıdy. Ekinshiden, ata-analar balalaryn úıde qaraýsyz qaldyrady», - dep habarlady departamenttiń qoǵammen baılanys toby.