Atyraý oblysynda KamAZ-ben soqtyǵysqan jeńil kóliktiń 3 jolaýshysy mert boldy
Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 18 shildede bolǵan.
«Jergilikti ýaqytpen saǵat 15:30 shamasynda Atyraý-Inder tas jolynyń 123-shaqyrymy tusynda Toyota Camry men KamAZ júk kóligi soqtyǵysqan. Jol-kólik apatynan Toyota Camry avtokóliginde bolǵan 3 jolaýshy oqıǵa ornynda mert boldy. Al jeńil kóliktiń júrgizýshisi aýrýhanaǵa jetkizildi. Qaıtys bolǵandar anasy men 1 jáne 15 jastaǵy qyzdary ekeni anyqtaldy. Olar – Batys Qazaqstan oblysynyń turǵyndary», - dep habarlady Inder aýdandyq jergilikti polıtsııa qyzmeti bólimshesiniń bastyǵy, polıtsııa podpolkovnıgi Batyrbek Qaıyrjanov.
Sondaı-aq búgin saǵat 14:20 shamasynda Atyraý qalasyndaǵy Vladımırskıı kóshesi Lada – 2115 jáne Toyota Estima avtokóligimen soqtyǵysty. Jol-kólik oqıǵasyna Lada – 2115 kóliginiń rýlinde bolǵan 1986 jylǵy júrgizýshisi basqarý júıesin ıgere almaı, joldyń qarsy jolaǵyna shyqqany sebep bolǵan. Soqqynyń saldarynan Toyota Estima avtokóliginiń 43 jastaǵy júrgizýshisi ártúrli dene jaraqatymen oblystyq aýrýhanaǵa jetkizildi.
Eske sala ketelik, buǵan deıin Atyraý oblysyndaǵy respýblıkalyq joldarda kólik apatynan 33 adam kóz jumǵanyn habarlaǵan edik.
Patrýldik polıtsııa rotasynyń komandıri, polıtsııa kapıtany Ádilbek Shahmetovtiń málimetinshe, jyl basynan beri jyldamdyqty asyrǵan 12 myńnan astam júrgizýshi anyqtalǵan.
«Atyraý oblysynyń aýmaǵymen ótetin respýblıkalyq mańyzy bar tas joldarda jyl basynan beri 38 jol-kólik oqıǵasy tirkeldi. Kólik apatynyń saldarynan 33 adam mert boldy. Al, 57 adam ártúrli dene jaraqatyn aldy. Jol-kólik oqıǵasynyń basym bóligi júrgizýshilerdiń basyp ozý erejesin buzýy, jyldamdyqty shamadan tys asyrýy saldarynan bolyp otyr», - dep málim etti Ádilbek Shahmetov.