Atyraý oblysynda epıdemıologııalyq ahýal kúrdelene tústi
Oblys ákimi Mahambet Dosmuhambetovtiń málimetinshe, epıdemıologııalyq ahýal áli de kúrdeli kúıinde qalyp otyr.
«Qaýipti vırýstyń taralýy kúnnen-kúnge órshýde. Bul – barshamyzdy qatty alańdatyp
otyrǵan jaǵdaı. Osy kezge deıin vaktsınatsııalaýǵa qatysty birneshe jıyn ótti. Naqty tapsyrmalar berildi. Biraq, jumys qarqyny áli de tómen. Bul vaktsınalaýǵa qatysty jumystyń qajetti deńgeıde uıymdastyrylmaǵanyn kórsetip otyr», -dedi Mahambet Dosmuhambetov.
Ákimniń aıtýynsha, vaktsınalaý – indettiń aldyn alýǵa ǵana emes, ujymdyq ımmýnıtetti qalyptastyrý úshin de kerek. Sol sebepten, basqarma basshylaryna baǵynysty mekemelerdegi qyzmetkerlerdi vaktsınatsııalaý deńgeıin 90 paıyzǵa deıin jetkizý júkteldi.
«Bárińizge kemshilikterdi túzetý úshin eki apta ýaqyt beremin. Jumys jolǵa qoıylmaıtyn
bolsa, sizderge qatysty tártiptik jaýapkershilik qaralatyn bolady», -dedi oblys ákimi.
Al, oblystyq densaýlyq saqtaý basqarmasynyń basshysy Ashan Baıdýálıevtiń málimetinshe, koronavırýs ınfektsııasyna qarsy vaktsınalaýdyń kúndelikti josparyna ózgeris engizilip, kún saıyn vaktsına alatyndar sany 1050-den 3500-ge deıin artady.
«Óńirge 170 295 doza I komponent, 138 695 doza II komponentke arnalǵan vaktsına jetkizildi. Sońǵy 10 kúnde vaktsına alǵan adamdardyń sany 13,1%-ǵa artyp otyr.
Vaktsınalaýǵa jatatyn kontıngentter arasynda eń joǵary kórsetkish quqyq qorǵaý organdaryna (170%), al, eń tómengi kórsetkish stýdentter (38,3%) arasynda baıqalýda», -deıdi Ashan Baıdýálıev.
Onyń pikirinshe, ınfektsııalyq statsıonarlardyń jansaqtaý bóliminde jatqan naýqastarǵa qatysty taldaý júrgizilgen. Qazir statsıonarlarda koronavırýs ınfektsııasyn juqtyrǵan
1 676 naýqas emdelip jatyr. Al, jansaqtaý bóliminde 95 naýqas oqshaýlanǵan. Jaǵdaıy
aýyr naýqastardyń birde-biri vaktsına almaǵan.
«Jylyoı aýdanynda turǵyndardyń 13,7 vaktsına saldyrǵan. Al, Maqatta – 22,5, Isataıda – 28,7, Qyzylqoǵa aýdany turǵyndarynyń 28,1 paıyzy vaktsına ektirgen», -deıdi Ashan Baıdýálıev.
Osyǵan baılanysty Mahambet Dosmuhambetov Jylyoı jáne Maqat aýdanynyń ákimderine jumysty tıisti deńgeıde oryndamaǵany úshin salaǵa jetekshilik etetin orynbasarlaryna qatysty tártiptik shara qoldanýdy tapsyrdy.
«Ár eki kún saıyn Atyraý qalasy men aýdandar, salalyq uıymdar, kásiporyndar jáne basqa da mekemelerdiń vaktsınalaý týraly baıandaýy qajet. Vaktsınamen qamtýdyń táýliktik kórsetkishin jaqsartý úshin naqty sharalar qabyldaý, aýdandardaǵy vaktsınalaý qarqynyn joǵarylatý úshin ádistemelik kómek kórsetý kerek. Respýblıkalyq vaktsınatsııa júrgizý jónindegi aqparattyq-túsindirý naýqanyn iske asyrýǵa arnalǵan jol kartasyn oblystyq deńgeıde jasaqtap, 2 kún merziminde bekitken jón», -dedi óńir basshysy.
Eske sala ketelik, budan buryn Atyraý oblysynyń ákimi vaktsınatsııany jandandyrýdy tapsyrǵanyn habarlaǵan edik.