Atyraý oblysynda ekpe alýdan bas tartqan eki adam kókjótel juqtyryp aldy
Atyraý oblystyq sanıtarııalyq-epıdemıologııalyq baqylaý departamentiniń bas mamany Jaınagúl Ótepqalıeva málimetinshe, bıylǵy 9 aıda kókjótel aýrýynyń 2 deregi tirkelip otyr.
Aýrý kórsetkishi 100 myń adamǵa shaqqanda 0,30% quraıdy.
«Kókjótel aýrýy byltyr tirkelgen joq edi. Al bıylǵy eki derek te Atyraý qalasynda tirkeldi. Onyń biri 14 jasqa deıingi baladan anyqtaldy. Naýqastyń ekeýi de kókjótelge qarsy ekpe almaǵan. Bul aýrýdy juqtyrýdyń kózi – naýqas adamdar. Olar ásirese, aýrýdyń bastapqy kezinde óte juqtyrǵysh keledi. Kókjóteldiń kez kelgen túri basqa adamdar úshin óte qaýipti dep esepteledi. Ásirese kókjótel ustamasy qysyp, qatty jótelgen kezde saqtanǵan jón. Óıtkeni qaqyryq bólshekteri 3 metrge deıin ushady. Eger kókjótelge turaqty ómirlik ımmýnıteti qalyptaspaǵan bolsa, bul syrqatpen kez kelgen jastaǵy adam aýyrýy múmkin», -deıdi Jaınagúl Ótepqalıeva.
Onyń aıtýynsha, kókjóteldiń aldyn alýdyń jalǵyz jáne tıimdi joly – mindetti vaktsınany alý. Bul vaktsına ómirge kelgen balanyń bir jasynda egiledi.
«Ata-analar úshin balalaryn ımmýndaý oryndy sheshim bolyp qala beredi. Vaktsına sýyq tııý, dene qyzýynyń kóterilýi sııaqty aýrýdyń belgileri joq, deni saý balalarǵa ǵana egý qarastyrylǵan. Vaktsınatsııa josparly túrde ulttyq egý kúntizbesine sáıkes 2, 3, 4, 18 aıda júrgiziledi», -dep málim etti Jaınagúl Ótepqalıeva.
Eske sala ketelik, budan buryn Atyraý oblysynda balalar arasynda juqpaly teri aýrýlary kóbeıgenin jazǵan edik.