Atyraý oblysynda ekologııany búldirgender 270 mln teńge aıyppul tóleıdi

ATYRAÝ. QazAqparat – Atyraý oblysynda 9 aıda ekologııany búldirýshiler 270 mln teńge aıyppul tóledi, dep habarlaıdy QazAqparat tilshisi.

Oblystyq ekologııa departamenti basshysynyń orynbasary Syrym Tilegenovtiń málimetinshe, 9 aıda ekologııalyq zańnamany buzǵan 177 derek anyqtaldy.

«Sharýashylyq júrgizý sýbektilerine ekologııalyq zańnamany saqtaýǵa qatysty 92 tekserý ótkizildi. Onyń ishinde 19 profılaktıkalyq baqylaý, jospardan tys 53, ózge de 20 tekserý bar. Olardyń qorytyndysymen ekologııalyq zańnamany buzǵan 177 derek anyqtaldy. Qorshaǵan ortany búldirýshilerge 40 nusqama berilgen edi. Osy kezge deıin 26 nusqama oryndaldy. Jyl basynan beri 172 ákimshilik is qozǵalyp, 5 eskertý berildi. Sot organdaryna 21 ákimshilik is qaraýǵa joldandy. Ekologııaǵa zalal keltirgenderge 270 mln 456 myń teńgeniń ákimshilik aıyppuly salyndy. Onyń ishinde 152 mln 277 myń teńgeniń 118 aıyppuly erikti túrde memleket paıdasyna óndirilip alyndy», - dep habarlady Syrym Tilegenov.

Onyń aıtýyna qaraǵanda, Atyraý oblysynyń ekologııalyq problemalaryn keshendi sheshý jónindegi 2022-2025 jyldarǵa arnalǵan Jol kartasynyń jańa nusqasy jasaqtalǵan. Jol kartasynda 7 bólim, 45 tarmaq bar. Qosymsha 26 tarmaq engizilgen.

Eske salaıyq, budan buryn Atyraý oblysynda úsh jerge munaı ónimi tárizdes suıyqtyq tógilgenin, keıin taǵy bir aýmaq munaı ónimine uqsaıtyn suıyqtyqpen búlingenin jazǵan edik.