Atyraý oblysynda ekologııalyq memorandýmǵa qol qoıyldy
«Ekologııalyq uıymdar qaýymdastyǵy» zańdy tulǵalar birlestiginiń tóraıymy Aıgúl Solovevanyń aıtýynsha, bul memorandým aımaqtyń ekologııalyq problemalaryn sheshýge septigin tıgizedi. Sonyń ishinde, óńirdegi qorshaǵan ortany qorǵaýǵa baǵyttalǵan sharalar keshenin talqylaý, qabyldaý, iske asyrýǵa mán berilmek. Atmosferaǵa ártúrli kózderden taraıtyn kómirqyshqyl gazyn azaıtý boıynsha ekologııalyq, zertteý jumystary jáne monıtorıng júrgizý úshin áleýmettik tapsyrysty qalyptastyrý da kózdeledi.
Oblys aýmaǵynda turǵyndardyń ekologııalyq qaýipsizdigin saqtaý maqsatynda tabıǵat qorǵaý baǵdarlamalary men ınvestıtsııalyq jobalardy daıyndap, júzege asyrý da memorandýmda kórsetilgen.
«Biz ózara seriktestikke nıettimiz. Problemalyq máseleler bar, olardy sheshý úshin álemdik tájirıbemen bólisýge daıynbyz. Qazir jańa Ekologııalyq kodeks boıynsha jumys istep jatyrmyz, jańa qaǵıdalar, jańa tásilder bar. Bárińizdi osy mańyzdy qujatty júzege asyrýǵa qatysýǵa shaqyramyn», - dep atap ótti Aıgúl Soloveva.
Atyraý oblysynyń ákimi Nurlan Noǵaev ekologııalyq problemalardy birlesip sheshý úshin bul memorandýmnyń mańyzdy ekenin aıtty.
«Aımaqtaǵy ekologııalyq ahýalǵa baılanysty máselelerdi sheshý bizdiń bárimiz úshin mańyzdy. Jer qoınaýyn paıdalanýshy kásiporyndardyń qorshaǵan ortaǵa áserin tómendetý boıynsha keshendi jumystar júrip jatyr. Balamaly energetıka bizdiń óńirde de engizilýde. Isataı aýdanynda qýaty 52 megavatt alǵashqy jel elektrstansasy salynyp jatyr. Oblystaǵy sý aıdyndarynda ekologııalyq sıpattaǵy máseleler bar. Bul máselelerdiń bárin qoǵamdyq uıymdardy jumyldyrý arqyly jarııa túrde sheshýimiz kerek. Sizderdiń qatysýlaryńyz biz úshin óte mańyzdy. Tájirıbelerińiz ben bilimderińiz óńirdegi qorshaǵan ortany saýyqtyrýǵa septigin tıgizedi degen senimdemiz», - dedi Nurlan Noǵaev.