Atyraý oblysynda eki jigit tún ortasynda qarýmen ustaldy
Atyraý oblystyq polıtsııa departamentiniń baspasóz qyzmetinen málim etkendeı, 1 qazannan beri «Kıik» keńaýqymdy aktsııasy ótip jatyr.
«Bul aktsııanyń maqsaty – kıik atýdyń jolyn kesý, onyń ónimderin zańsyz daıyndaýmen, satýmen aınalysatyn adamdardy anyqtaý. Polıtsııa qyzmetkerleri Atyraý oblysynyń aýmaǵymen ótetin «Astrahan-Aqtóbe» tasjolynyń boıynda túngi saǵat 01:30 shamasynda «LADA» kóligin toqtatyp, tekserý júrgizdi. Kólikte 1994 jáne 1991 jylǵy jigitter bolǵan. Olar 12-kalıbrli eki uńǵyly úsh qarý men 1 dana frıskateldi, soıylǵan 2 qoıan etin alyp kele jatqan», -dep habarlady departamenttiń baspasóz qyzmeti.
Qazir atalǵan derekke qatysty QR Qylmystyq kodeksiniń 337-babynyń 3-bóligimen sotqa deıingi tergep-tekserý bastaldy.
«Polıtsııa qyzmetkerleri «Kıik» aktsııasy aıasynda Atyraý qalasynyń mańyndaǵy Damby, Amangeldi, Jambyl, Peshnoı eldi mekenderinde reıd ótkizdi. Reıd kezinde ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý deregine qatysty 21 quqyq buzýshylyq anyqtaldy. Zańnama talabyn buzǵan 19 adamǵa 230 myń teńgeniń aıyppuly salyndy», -dep málim etti departamenttiń baspasóz qyzmetinen.
«Kıik» keńaýqymdy aktsııasy 31 jeltoqsanǵa deıin jalǵasady.
Eske sala ketelik, budan buryn Atyraý oblysynyń turǵynynan 8 kıiktiń múıizi tárkilengenin habarlaǵan bolatynbyz.