Atyraý oblysynda eki kún qatarynan eshkim koronavırýs juqtyrǵan joq

ATYRAÝ. QazAqparat – Atyraý oblysynda eki kún qatarynan koronavırýs ınfektsııasyn juqtyrǵan naýqastar tirkelgen joq, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń málimetine súıensek, 4-5 naýryzda qaýipti vırýsty juqtyrý deregi tirkelmegen.

«Atyraý oblysynda koronavırýs ınfektsııasyna shaldyǵýshylar sany azaıyp, epıdemıologııalyq ahýal jaqsardy. Buǵan sońǵy eki táýlikte qaýipti vırýsqa shaldyqqan naýqastardyń tirkelmegeni dálel bola aldy. Qazir 151 adam úı jaǵdaıynda, al, 21 naýqas modýldik aýrýhananyń ınfektsııalyq statsıonarynda em alyp jatyr. Óńirdiń 2 360 oryndyq ınfektsııalyq statsıonaryndaǵy júkteme – 0,9%. Al, 106 tósek-orny bar jansaqtaý bóliminde 2 naýqas em qabyldaý úshin oqshaýlanǵan. Bul bólimdegi júkteme 1,9%-dy quraıdy. Ókpeni jasandy jeldetý apparatyna qosylyp jatqan naýqastar joq», -dep málim etti basqarmanyń baspasóz qyzmetinen.

Eske sala ketelik, buǵan deıin Atyraý oblysynda statsıonarda 22 naýqas emdelip jatqanyn jazǵan bolatynbyz.