Atyraý oblysynda din salasyndaǵy zańnamany buzǵan 98 azamat jaýapqa tartyldy
Polıtsııa departamentiniń qyzmetkerleri oblystyq din isteri basqarmasymen birge áleýmettik jelilerge júrgizilgen monıtorıng kezinde dinı saladaǵy ákimshilik quqyq buzýshylyqqa qatysty 98 derekti anyqtaǵan.
«Atap aıtqanda, buqaralyq aqparat quraldarynyń ónimin, sol sııaqty ózge de ónimdi Qazaqstan Respýblıkasynyń aýmaǵynda daıyndaý, saqtaý, ákelý, tasymaldaý, taratýdyń zańsyz faktisine baılanysty 56, dinı qyzmet jáne dinı birlestikter týraly zańnamasyn buzǵan 42 quqyq buzýshylyq tirkeldi. Anyqtalǵan quqyq buzýshylyqtardy jasaǵan tulǵalarǵa qatysty QR Ákimshilik quqyq buzýshylyq týraly Kodeksiniń 453 jáne 490-babymen ákimshilik hattamalar toltyryldy» - dep habarlady oblystyq polıtsııa departamentiniń baspasóz qyzmeti.
Atyraý qalalyq mamandandyrylǵan ákimshilik sotynyń sheshimimen 98 azamatqa 3 263 983 teńge mólsherinde aıyppul salyndy.