Atyraý oblysynda brakonerlerden 770 keliden astam bekire tárkilendi

ATYRAÝ. QazAqparat – Jaıyq-Kaspıı basseıniniń sý aıdyndarynda «Bekire – 2023» keń aýqymdy aktsııasy bastalǵannan beri brakonerlerden 7,5 tonnadan astam balyq tárkilendi. Onyń ishinde 770,25 keli bekire, 29,5 keli qara ýyldyryq bar, dep habarlaıdy QazAparat tilshisi.

Balyq sharýshalyǵy komıteti baspasóz qyzmetiniń málimetinshe, atalǵan aktsııa 1 sáýirde bastalǵan. Sodan beri Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary Shekara qyzmetiniń jáne quqyq, tabıǵat qorǵaý organdary qyzmetkerlerimen birge zańsyz balyq aýlaýǵa qatysty 754 derekti anyqtady. Quqyq buzǵan 518 adam ákimshilik jaýapqa tartyldy.

«Brakonerlikke, sırek kezdesetin jáne joıylyp ketý qaýpi tóngen balyq túrlerin zańsyz aýlaýǵa baılanysty 28 qylmystyq is qozǵaldy. Zań buzýshylarǵa 11,1 mln teńgege aıyppul salyndy. Zańsyz aınalymnan 7 tonna 534 keli balyq, onyń ishinde 770,25 keli bekire tuqymdas balyq túrleri, 29,5 keli qara ýyldyryq alyndy. Brakonerlerden 257 balyq aýlaý quraly, 62 sý kóligi men 12 avtomashına tárkilendi. Balyq resýrstaryna 400 mln teńgeden astam zalal keltirildi», - dep habarlady komıtettiń baspasóz qyzmetinen.

Jaıyq ózeniniń arnasy men Kaspıı teńiziniń akvatorııasyndaǵy sý aıdyndarynan jalpy uzyndyǵy 60 shaqyrymnan asatyn 663 zańsyz balyq aýlaý quraly tabylǵan.

«Bekire – 2023» aktsııasy 31 mamyrǵa deıin jalǵasady.

Eske sala ketelik, buǵan deıin brakonerler Atyraý oblysynda 64 mln teńgeniń balyǵyn qamys arasyna jasyryp ketkenin jazǵan edik.

Keıin Atyraýda qamys arasynan brakonerler jasyrǵan 105 mln teńgeniń bekiresi tabylǵanyn habarlaǵan bolatynbyz.