Atyraý oblysynda bıyl eki eldi meken turǵyndary kóshirilýi múmkin
Atyraý oblysynyń ákimi Serik Shápkenov Maqat aýdanyndaǵy Báıgetóbe aýylynyń turǵyndarymen kezdesýde bıyl eki eldi mekenniń turǵyndary kóshirilýi múmkin ekenin joqqa shyǵarmady.
Eki eldi meken de Maqat aýdanynyń aýmaǵymen ótetin temirjol boıynda ornalasqan. Temirjol beketindegi turǵyndardy kóshirý máselesi birazdan beri sheshimin tappaı keledi.
«Buryn NCOC kompanııasymen eki eldi mekenniń turǵyndaryn kóshirýge qatysty kelisim jasalǵan. Qazir osyǵan baılanysty jumys júrip jatyr. Kompanııa basshylyǵy turǵyndardy kóshirý jumystaryna atsalysýǵa daıyn ekenin bildirdi. Biraq, turǵyndardy qaıda kóshirý kerek? Olar aýdan ortalyǵyna, ne ózge eldi mekenge kóshkisi kelmeıdi. Kópshiligi Atyraý qalasyna kóshýge suranys bildirip otyr», - deıdi Serik Shápkenov.
Ákimniń aıtýynsha, qazir Atyraý qalasyndaǵy Talqaıran shaǵyn aýdanynda kópqabatty 24 úı salynǵan. Alaıda, ınfraqurylym jelileri daıyn bolmaǵandyqtan, turǵyn úıler paıdalanýǵa berilmegen.
«Bıyl atalǵan shaǵyn aýdanǵa ınfraqurylym jelileri júrgiziledi. Sodan soń Talqaıran shaǵyn aýdanynan jer telimin bólip, eki eldi mekenniń turǵyndaryn kóshirýge sharalar qabyldaımyz», - dedi Serik Shápkenov.
Qazir Taskesken eldi mekeninde 10-ǵa jýyq, al Eskenede 50-ge jetpeıtin otbasy turady.
Eske sala ketelik, budan buryn Atyraýdyń Reseımen shekaradaǵy aýdanynda 2 eldi meken qurylatynyn habarlaǵan edik. Qurmanǵazy aýdanynyń Qurmanǵazy aýyldyq okrýgindegi «Bolashaq» jáne «Shıpajaı» shaǵyn aýyldaryn jańa eldi meken retinde qaıta qurý josparlanǵan. Qazir munda ınjenerlik-kommýnıkatsııalyq ınfraqurylymnyń qurylysy aıaqtalǵan. Josparǵa sáıkes bul joba 468 jer ýchaskesine arnalǵan.