Atyraý oblysynda bıyl AITV ınfektsııasyn juqtyrý 1,8 ese ósken

ATYRAÝ. QazAqparat – Atyraý oblysynda bıylǵy 10 aıda AITV ınfektsııasyn juqtyrý kórsetkishi 1,8 esege ósken. Qaýipti ınfektsııany juqtyrǵandar arasynda 5 sheteldik, 56 qazaqstandyq bar, dep habarlaıdy QazAqparat tilshisi.

Oblystyq JITS-pen kúres jáne aldyn alý ortalyǵy dırektorynyń orynbasary Gúlnár Omarovanyń málimetinshe, jyl basynan bergi 10 aıda AITV ınfektsııasyn juqtyrǵandar sany 61-ge jetken.

«Byltyrǵy 10 aıda atalǵan ınfektsııany 36 adam juqtyrǵan edi. Al, bıyl AITV ınfektsııasyna shaldyqqandar arasynda 5 sheteldik pen elimizdiń 56 azamaty bar. Ótken jyldyń osy kezeńimen salystyrǵanda, juqtyrý kórsetkishi 1,8 esege ósip otyr. Juqtyrýshylardyń basym bóligi – er adamdar», -deıdi Gúlnár Omarova.

Onyń aıtýynsha, AITV ınfektsııasymen tirkelgender sanynyń artýyna turǵyndardy testileý kórsetkishiniń 10 paıyzǵa óskeni sebep bolǵan.

«Máselen, klınıkalyq kórsetkishke sáıkes tekserilgender sany 36 paıyzǵa artty. Turǵyndardyń táýekel topqa jatatyndardyń arasynda AITV juqpasy boıynsha túsindirý, aldyn alý jumystarynyń jıileýi nátıjesinde testileýden ótýge jiberilgen adamdardyń da sany kóbeıdi», -dep málim etti Gúlnár Omarova.

Óńirlik ortalyq dárigerleriniń aıtýynsha, Atyraý oblysynda eń alǵash ret AITV ınfektsııasy 1993 jyly tirkelgen. Bul ınfektsııanyń taralýynyń úsh joly anyqtalyp otyr. Bul – jynystyq, ınektsııalyq jáne anasynan balaǵa juǵý. Qazir jynystyq jolmen taralý jaǵdaıy kóbeıgen.

Eske sala ketelik, buǵan deıin Atyraý oblysynda bir jylda 47 adam AITV ınfektsııasyn juqtyrǵanyn habarlaǵan bolatynbyz.

Ashyq kózderden alynǵan foto