Atyraý oblysynda bir otbasynyń eki balasy narkologııalyq esepke alynǵan
Oblys ákiminiń orynbasary Baqytgúl Hamenovanyń tóraǵalyǵymen ótken kámeletke tolmaǵandardyń isteri jáne olardyń quqyqtaryn qorǵaý jónindegi oblystyq komıssııa otyrysynda jasóspirimder arasyndaǵy esirtkige táýeldilik máselesi qozǵaldy.
Jylyoı aýdany ákiminiń orynbasary Ánýar Shákirovtiń aıtýyna qaraǵanda, polıtsııa esebine 9 kámeletke tolmaǵan alynǵan.
«Olardyń tórteýi jalpy orta bilim beretin mekteptiń oqýshylary bolsa, beseýi arnaýly jáne joǵary bilim beretin uıymdardyń stýdentteri. Sonymen qatar, tórt oqýshynyń úsheýi arnaıy esepke qoıyldy», - dedi Jylyoı aýdany ákiminiń orynbasary Ánýar Shákirov.
Osyǵan oraı oblys ákiminiń orynbasary Baqytgúl Hamenova Jylyoı aýdanynda narkologııalyq esepte bir otbasydan eki balanyń turǵanyn synǵa aldy. Osyǵan oraı aýdan basshylyǵyna tıisti jumystardy atqarýdy tapsyrdy.
«Biz esepte turǵan balalardyń bolashaǵyna jaýaptymyz. Olardyń jaqsy tárbıe alyp, ómirde óz ornyn tabýyna tikeleı yqpal etýimiz kerek. Salaǵa jaýapty mamandar ár balaǵa tulǵa retinde qaraýy tıis» dep atap ótti Baqytgúl Hamenova.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, psıhıkalyq densaýlyq ortalyǵynda psıhıatrııalyq esepte turǵan naýqastar úshin 145 tósek-oryn bar. Onyń ishinde narkologııalyq patologııasy bar kámeletke tolmaǵandar úshin 5 tósek-oryn jasaqtalǵan.
«Kámeletke tolmaǵan jasóspirimder arasynda ýytqumarlyqqa salynǵan úsh qulsarylyq tirkeýge alyndy. Olarǵa narkolog maman tekseris júrgizýde», - dedi basqarma basshysy Ashan Baıdýálıev.
Atyraý qalasy ákiminiń orynbasary Samat Embergeniń málimetinshe, balalardyń bos ýaqytyn tıimdi ótkizýine yqpal etetin balalar oıyn alańy kóbeıe túsken. Bul qala turǵyndarynyń, PIK jáne oblystyq, qalalyq máslıhat depýtattarynyń usynysyna baılanysty qolǵa alynǵan.
«Kóp qabatty bes turǵyn úıdiń aýmaǵyna abattandyrý jumystary júrgizildi. Atalǵan joba aıasynda alty fýtbol alańy, 11 balalar oıyn alańy, 8 sporttyq-jattyǵý alańy, 24 eresekter otyratyn alań ornatý qarastyryldy. Tozyǵy jetken bir fýtbol, úsh balalar oıyn alańy aýystyryldy.
Bıyl 100 balalar oıyn alańyn aǵymdyq jóndeý jumystaryna jergilikti bıýdjetten qarajat bólinip, merdiger mekemeni anyqtaý maqsatynda ashyq konkýrs jarııalanǵan bolatyn. Alaıda, pandemııanyń birinshi tolqynynda jarııalanǵan tótenshe jaǵdaıǵa baılanysty qurylys jumystaryndaǵy qıyndyqtar saldarynan qarajat bıýdjetke keri qaıtaryldy», - dep naqtylady Samat Embergen.
Komıssııa otyrysynda oblys ákiminiń orynbasary Baqytgúl Hamenova jaýapty organdarǵa balalardyń bilim berý ortasyndaǵy psıhologııalyq qaýipsizdigin arttyrýǵa, salaýatty ómir saltyn saqtaýǵa, kámeletke tolmaǵandar arasynda quqyq buzýshylyqtyń aldyn-alýǵa baǵyttalǵan birqatar tapsyrma berdi.
Eske sala ketelik, budan buryn Atyraýda túnimen kóshe kezgen 131 jasóspirim ustalǵan bolatyn.