Atyraý oblysynda bir aıǵa jetpeı 8 adam sýǵa batyp ketken
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, sýǵa túsý maýsymy jyldaǵydan 15 kúnge keshigip bastalǵan.
«Atyraý oblysynda jyl basynan beri 10 adam, onyń ishinde 3 bala sýǵa batyp ketti. Onyń ishinde 8 adam shomylý maýsymy bastalǵan 15 maýsymnan beri jantásilim etti. Qutqarýshylar 4 adamdy qutqaryp qaldy. Bir jasóspirimdi izdestirý jalǵasyp jatyr», -dep habarlady departamenttiń qoǵammen baılanys toby.
Statıstıkalyq taldaýǵa sáıkes, sýǵa batýdyń birneshe sebebi anyqtalyp otyr.
Máselen, eresek turǵyndar mas kúıinde sýǵa shomylý, óz kúshin asyra baǵalaý saldarynan oqys oqıǵaǵa urynady.
Al, kámeletke tolmaǵandar ata-anasynyń, týystarynyń jáne jaqyndarynyń baqylaýynsyz sýǵa túsedi.
«Bir jasóspirim tereń kanalǵa qulap, kóz jumdy. Ekinshisi arnaıy jabdyqtalmaǵan jerde shomylý kezinde, úshinshisi qatty aǵysy bar ózenge attan qulap, jantásilim etti. Sol sebepten, ata-analarǵa balalardy qaraýsyz qaldyrmaýdy, sý aıdyndaryna óz betimen shomylýǵa jibermeýdi eskertemiz», -dep málim etti departamenttiń qoǵammen baılanys tobynan.
Shomylý maýsymy bastalǵannan beri quqyq buzýshylarǵa 191 hattama toltyrylǵan.
Eske sala ketelik, budan buryn Atyraý oblysy sý aıdyndarynda shomylýǵa qaýipti 70 ýchaske baryn habarlaǵan edik.