Atyraý oblysynda balyq ósiretin 8 kásiporyn ashylady

ASTANA. QazAqparat – Atyraý oblysynda balyq ósiretin 8 kásiporyn ashylady. Bul týraly Atyraý oblysynyń ákimi Serik Shápkenov aıtty, dep habarlaıdy QazAqparat tilshisi.

«Óńirimizdegi basty salalardyń biri – balyq sharýashylyǵy. Atyraý tek munaıymen ǵana emes, balyǵymen de aty shyqqan óńirdiń biri. Byltyr 14 myń tonnadan astam balyq aýlandy. 200 tonnadaı balyq ósirildi. Balyqty aýlap qana qoımaı, ósirýimiz de kerek. Osy baǵyttaǵy jumys jalǵasatyn bolady. 2025 jylǵa deıingi josparymyz bar», - dedi oblys basshysy Ortalyq kommýnkatsııalar qyzmetindegi baspasóz máslıhatynda.

Onyń atap ótýinshe, balyq ósiretin 8 kásiporyn jáne 1 balyq óńdeý tsehyn ashý josparlanyp otyr. Nátıjesinde balyq ósirý kólemi jylyna 7 myń tonnaǵa jetedi. Bul jalpy aýlanatyn balyqtyń 50 paıyzyn qamtıdy.

«Tereń óńdeletin balyq kólemi 4 esege artady. Óıtkeni, biz balyqty aýlap, satyp qana qoımaı, ony tereń óńdep, ózindik quny joǵary ónim retinde eksportqa shyǵarýymyz qajet bolady», - dedi Serik Shápkenov.