Atyraý oblysynda avtogaz tapshylyǵynyń týyndaý sebebi aıtyldy

ATYRAÝ. QazAqparat – Atyraý oblysynyń tutynýshylaryna gaz jetkizý 35 paıyzǵa azaıdy. Bul avtogaz quıý stansalarynda gaz tapshylyǵynyń týyndaýyna sebep bolyp otyr, dep habarlaıdy QazAqparat.

Óńirlik kommýnıkatsııalar qyzmetiniń málimetine súıensek, qazir Atyraý oblysynda gaz jetkizetin 30 kásiporynnyń 96 avtogaz quıý stansasy jumys isteıdi. Energetıka mınıstrliginiń hatyna sáıkes, Atyraý munaı óńdeý zaýytynan oblys tutynýshylary úshin 5 744 tonna gaz jetkiziledi.

«Alaıda, Atyraý munaı óńdeý zaýytynda josparly jóndeý jumystarynyń júrgizilýine baılanysty qazirgi ýaqytta gaz jetkizý kólemi 35%-ǵa qysqardy. Qazir zaýyttan jetkiziletin gaz mólsheri – 3785,161 tonna», - dep habarlady óńirlik kommýnıkatsııalar qyzmeti.

«Atyraý munaı óńdeý zaýyty» JShS-niń málimetinshe, josparly jóndeý jumystaryn júrgizý kezinde atalǵan zaýyttan táýligine 90 tonna gaz jetkizilse, 6 qarashadan beri bul kórsetkish 60 tonnany quraǵan. Bul avtogaz quıý stansalaryndaǵy gaz tapshylyǵynyń qalyptasýyna sebep bolyp otyr. Endi zaýytta 19-25 qarasha aralyǵyńda boljamdy gaz óndirisi táýligine 800 tonnany quraıtyn bolady.

«Atyraý oblysynyń tutynýshylary úshin gaz jetkizýdi turaqtandyrý maqsatynda jergilikti atqarýshy organdar Energetıka mınıstrligimen birlesip uıymdastyrý jumysyn júrgizip jatyr. Atap aıtqanda, kórshiles Aqtóbe oblysyndaǵy «Gas Processing» kompanııasynan 400 tonna, «Qazaqoıl Aqtóbe» kompanııasynan 700 tonna gaz jetkizý josparlanyp otyr», -dep málim etti óńirlik kommýnıkatsııalar qyzmetinen.

Eske sala ketelik, budan buryn Atyraý munaı óńdeý zaýytyndaǵy jóndeý jumystary 45 kúnge sozylatynyn habarlaǵan edik.