Atyraý oblysynda aýyl sharýashylyǵyn damytýǵa 2,5 mlrd teńge bólingen

ATYRAÝ. QazAqparat – Bıyl Atyraý oblysynda aýyl shýarýashylyǵyn damytýǵa 2 mlrd 539 mln teńge bólingen. Alaıda, jyl basynan beri sharýagerlerden sýbsıdııa alýǵa ótinim túspegen, dep habarlaıdy QazAqparat.

Oblystyq aýyl sharýashylyǵy basqarmasynyń basshysy Amangeldi Salamattyń málimetinshe, atalǵan salada 3 200-ge jýyq zańdy jáne jeke tulǵalar tirkelgen. Onyń jartysyna jýyǵy aýyl sharýashylyǵynda kásip ashqan.

«Atyraý oblysyndaǵy aýyl sharýashylyǵy salasyn damytý úshin jergilikti jáne respýblıkalyq bıýdjetten 2 mlrd 539 mln teńge bólinip otyr. Onyń ishinde 1 mlrd 50 mln teńge mal sharýashylyǵyn órkendetýge jumsalady. Al 320 mln teńge egin sharýashylyǵyn damytýǵa baǵyttalady. Sondaı-aq 720 mln teńgeni ınvestıtsııalyq shyǵystardyń bir bóligin óteýge jumsaý kózdelgen», - deıdi Amangeldi Salamat.

Onyń aıtýyna qaraǵanda, bıylǵy jyl bastalǵaly beri atyraýlyq sharýagerler tarapynan sýbsıdııa alýǵa ótinim túspegen.

«Sýsıdııalaý máselesinde birqatar problemalar bar. Osy máselelerdi sheshý maqsatynda sýbsıdııalaýdyń negizgi erejeleri men qaǵıdalaryna ózgerister engizý jaıy qarastyrylyp jatyr. Osyǵan oraı Atyraý oblysynan usynystar joldandy. Naýryz aıynyń sońyna deıin jańa ózgerister engiziletini kútilip otyr», - dep málim etti Amangeldi Salamat.

Eske sala ketelik, buǵan deıin Atyraý oblysynda azyq-túlik baǵasyn turaqtandyrýǵa 1 mlrd 35 mln teńge bólingenin habarlaǵan edik.